5’ê Tîrmeha 1991’an Serokê Partiya Kedê ya Gel (HEP) ê Amedê Vedat Aydin ji aliyê JÎTEM’ê ve hate revandin, piştre hate qetilkirin û cenazeyê wî avêtin navçeya Maden a Xarpêtê. Bi wesîleya Cejna Remezanê Vedat Aydin li ser gora xwe ya li Amedê hate bîranîn.
Bîranîn bi pêşengiya MEBYA-DER’ê hate lidarxistin. Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP), Berdevka Meclîsa Jinan a DEM Partiyê Halîde Turkoglû, parlamenter Adalet Kaya, Hevşaredarên Bajarê Mezin a Amedê Serra Bûcak û Dogan Hatûn û hevşaredarên navçeyê tevlî bîranînê bûn.
Bîranîn li Goristana Mardîn Kapi ya li navçeya Sûrê hate lidarxistin. Merasîm bi deqeyek rêzgirtinê destpê kir.
Hevjîna Vedat Aydin, Şukran Aydin di bîranînê de axivî û diyar kir ku gelê Kurd berdêlên mezin dane. Şukran Aydin bal kişand ser girîngiya banga Rêber Apo ya ‘Aştî û Civaka Demokratîk’ û got, “Divê lêborîn ji malbatên windayan bê xwestin. Divê ev yek di aliyê qanûnî de li Meclîsê derbas bibe.”
Hevşaredara Bajarê Mezin a Amedê Serra Bûcak jî wiha got, “Di Şexsê Vedat Aydin de ez kedkarên têkoşîna azadî û demokrasiyê bi rêzdarî bi bîr tînim.”
Berdevka Meclîsa Jinan a DEM Partiyê Halîde Turkoglû jî destnîşan kir ku ew ê hesabê ji faîlan bipirsin û got, rojên aştiyê pir nêz in.
Hevseroka DEM Partiyê ya Amedê Gulşen Ozer jî ev tişt bilêv kir: “Me gelek hevalên xwe di vê têkoşînê de winda kirin. 100 sal in Kurd li ser piyane û têdikoşin.”
Di dawiya bîranînê de qurnefîl danîn ser gora Aydin.
