Rojnameya “Wall Street Journal” a Amerîkayê di raporekê de destnîşan kir ku çeteyên DAÎŞ’ê çalakiya xwe li Sûriyeyê zêde kiriye. DAÎŞ’ê sûdê ji valahiya ewlehî û siyasî ya piştî vekişîna hêzên Amerîkayê ji hin xalan û paşketina girîngîdayîna navneteweyî bi dosyaya têkoşîna dijî “terorê” li xaka sûriyeyê, werdigire.
Di raporê de hat diyarkirin ku ji destpêka 2025’an ve çeteyên DAÎŞ’ê zêdetirî 117 êriş li seranserî Sûriyeyê pêk anîn. Li hemberî wê di 2024’an de 73 êriş pêk hatibûn.
Li gorî rojnameyê, paşketina hebûna Amerîkayê li Bakur û Rojhilatê Sûriyeyê derfet da çeteyan ku ji nû ve xwe bi rêxistin bikin, bi wê re şiyana Koalîsyona Navneteweyî ji bo çavdêriya li çolistanê, sînorê Sûriye-Iraqê ku tê de çalakiya şaneyên DAÎŞˊê zêde ne, lawaz kiriye.
Hat diyarkirin ku çeteyên DAÎŞ’ê êdî taktîkên nû bi kar tînin, ew jî şerê kolanan ê bi rêya şaneyên biçûk e ku her şaneyek herî zêde ji 5 kesan pêk tê û her demekê êrişan pêk tînin.
Li gorî raporê, gelek sedemên vegerandina çalakiyên DAÎŞˊê hene; weke tevliheviya ewlehî, binketina hikumeta veguhêz di serwerîkirina tevahî herêmên beyarê de, ku wê jî rûberên fireh ji çeteyan re hiştin ku bi serbest tev bigerin.
Di raporê de hat gotin ku li Sûriyeyê 2 hezar û 500 heta 3 hezar çeteyên DAÎŞ’ê hene, piraniya wan li çolistanê û Dêrazorê ne.
Rojnameyê hişyarî der barê bilindkirina van çalakiyan de da, ku êdî sînorê Sûriyeyê derbas dike.
Rojname ku agahiyên xwe dispêre çavkaniyên îstîxbaratî yên rojavayî da zanîn ku hin serkirdeyên çeteyan xetên xwe yên peywendiyê bi şaneyên li Iraq, Afganistanê û Bakurê Afrîkayê re ji nû ve vegerandine. Ev jî gengaziya xeteriya DAÎŞˊê li ser asta cîhanî çêdike.
