Bi sedan şêniyên kantona Firatê, endamên saziyên Rêveberiya Xweser, rêxistinên jinan û partiyên siyasî sersaxî da malbatên şervanên Hêzên Sûriya Demokratîk (QSD) şehîd Berxwedan Kobanê (Tewfîq Ebdulrezaq Heto) ku di 18’ê Cotmeha 2025’an de li gundê Hûriyê yê Kobanê şehîd bûbû û şehîd Kemal Cûdî (Kemal Kenco) di 16’ê Çileyê 2025’an de li Bendava Tişrînê şehîd bûbû.
Konê sersaxiyê yê merasîma ji bo şehîd Kemal Cûdî li Taxa Şehîd Moro û yê merasîma ji bo şehîd Berxwedan Kobanê jî li taxa Kaniya Kurdan a bajarê Kobanê hate vedan.
Girseya gel bi dirûşmên “Şehîd namirin” û “Bi can bi xwîn em bi te re ne ey şehîd” berê xwe da konê sersaxiyê.
Li bin konê şehîd Kemal Cûdî, deqeyekê rêz ji bo giyanên cangoriyên azadiyê hat girtin, dûre berdevkê Însiyatîfa Azadiya Rêber Abdullah Ocalan a Kantona Firatê Bekir El Ceradê sersaxî ji malbatên şehîdan re xwest û soza şopandina rêya şehîdan da.
Bekir El Ceradê anî ziman ku şehîdan ji bo parastina ax û gelê xwe têkoşîn û berxwedaneke bêhempa da meşandin û wiha got: “Gelê Kurd ji bo rûmetê gelek bedel dan û berxwedaneke bêhempa da meşandin. Şervanên me her tim heta kêliya xwe ya dawiyê ji bo rûmata xwe têkoşîn dikirin. Em jî soz didin ku em ê tu carî xwîna şehîdên xwe li erdê nehêlin.”
Endama Meclisa Malbatên Şehîdan a kantona Firatê Nejmê Kenco anî ziman ku ew tu carî bi şehadetê xemgîn nabin, hîna zêdetir kîna wan li hember dijmin xurttir dibe û wiha got: “Em ê her tim li pişta şervanên xwe bin û sopdarên rêya şehîdên xwe bin, xeta ku em xewn û xeyalên wan pêk tînin.”
Her wiha li bin konê şehîd Berxwedan Kobanê jî endamên Meclisa Leşkerî Mihemed Oso sersaxî ji malbata şehîd Berxwedan re xwest û wiha got: “Şehîd nasname, ziman û dîroka me ne. Şehîdên me dema ku soz da ku ew ê li gel û axa xwe ji dijmin biparêzin û em jî wî sozî didin şehîdên xwe, em ê xewn û xeyalên şehîdên xwe ta azadiyê pêk bînin.”
Merasîma sersaxiyê bi dirûşma “Şehîd namirin” bi dawî bû.
