Bi sedan şêniyên bajarê Tirbespiyê îro ji bo tevlî merasîma oxirkirina şervanê Erka Xweparastinê Ebdulrezaq Mihemed ku di 3’ê Nîsanê de ji ber nexweşiya giran şehîd bû bibin, ber bi mezara şehîd Dilşîr a gundê Digirê ve ketin rê. Di merasîmê de nasnameya şervanê QSD`ê Şêro Tirbespiyê (Emced El Hebîb) û Ayid Tirbespiyê (Omer El Hebîb) ku di 2’ê Çile de di berxwedana li Bendava Tişrînê de şehîd bûn hate eşkerekirin.
Merasîm bi deqîqeyek rêzgirtinê dest pê kir. Piştre ji rêveberên Meclisa Malbatên Şehîdan Mihemed Zekî Îbrahîm axivî û got, “Em weke Meclisa Malbatên Şehîdan soz didin şehîdên xwe ku li ser şopa wan bimeşin û destkeftiyên wan biparêzin.”
Li ser navê Rêveberiya Xweser hevserokê Meclisa Zagonsaz a Kantona Cizîrê Hikmet El Hebîb axaftinek kir û tekez kir ku fedakariyên mezin ên gelê Bakur û Rojhilatê Sûriyeyê yên ji bo parastina ewlekarî, aştiya sivîl û yekîtiya xaka Sûriyeyê encam dane.
Endamê Kongreya Îslama Demokratîk Şêx Ela El Dîn Mihemed axivî û destnîşan kir ku şehadet yek ji destkeftiyên herî mezin ên jiyanê ye, rêya ku kur û keçên Bakur û Rojhilatê Sûriyê ji bo parastina malbat û welatê xwe hilbijartiye ye.
Endamê Meclisa Pêwendiyên Leşkerî li Qamişlo Mihemed Zêdan tekez kir ku Hêzên Sûriya Demokratîk girêdayî soza xwe ya parastina aştiya navxweyî û jiyana hevbeş e. her wiha got, “Ji ber vê yekê îro em dibînin ku xwîna hemû pêkhateyên dinava van hêzan de tevlî hev bûye.”
Li ser navê malbatên her du şehîdan pismamê wan Ferûq El Hebîb axivî û diyar kir ku ew ê li ser rêya şehîdên xwe berdewam bin heta ku jiyanek azad û bi rûmet ji bo hemû gelê Sûriyeyê pêk were.
Piştî xwendina belgenameyên şehîdan cenazeyê şehîd Ebdulrezaq Mihemed bi tilîlî û dirûşmeyan li goristana şehîd Dilşêr spartin axê.
