Piştî ku YE’yê bi sedemên kêmasiya zelaliyê, pratîkên şaş û sîstema “tîka şîn” (blue tick) a ku bikarhêneran dixapîne, ceza li platformê birî, Elon Musk li ser X’ê ev daxuyanî da: “Divê YE bê belav kirin û serwerî ji her welatekî re bê vegerandin, da ku hikûmet bikaribin gelê xwe baştir temsîl bikin.” Ev parvekirin di demek kurt de bi hezaran şîrove û parvekirin kom kir.
YE’YÊ GOT: EV DAXUYANIYEKE ŞÊT E
Berdevka Komîsyona YE’yê Paula Pinho, bertekeke tund nîşanî gotinên Musk da û daxuyanî weke “bi tevahî şêtî” bi nav kir. Lêbelê, di heman demê de bal kişand ser azadiya derbirînê jî û got, “Ev beşek e ji azadiya derbirînê ku em li YE’yê qîmetê didinê û destûrê dide daxuyaniyên herî şêt jî.”
ÇIMA CEZA HATE BIRÎN?
YE’yê platformê bi taybetî di sê mijaran de bi “lihevnekirina bi DSA re” tawanbar dike:
Sîstema tîka şîn: Bikarhêner têne xapandin, ji ber ku her kesê ku pere dide dikare bêyî piştrastkirina nasnameyê “hesabekî piştrastkirî” bistîne.
Kêmasiya zelaliya reklaman: X tomarên reklamên xwe bi têra xwe eşkere pêşkêş nake.
Sînorkirina gihîştina daneyan ji lêkolîneran re: Gihîştina daneyên giştî hatiye sînorkirin.
Ji bo sererastkirina sîstema tîka şîn 60 rojên kar, û ji bo pêşkêşkirina plana zelaliya reklaman jî 90 roj hatin dayîn. Heke neyê bicihanîn, cezayên pere yên zêde dê werin rojevê.
BERTEKA DYA’YÊ: EV ÊRÎŞA LI SER GELÊ AMERÎKÎ YE
Biryara YE’yê rêveberiya DYE’yê jî hêrs kir. Wezîrê Derve yê DYE’yê Marco Rubio, bi gotina “Ev ceza ne tenê êrîşeke li ser Xê ye, lê êrîşeke ku ji aliyê hikûmetên biyanî ve li ser hemû şirketên teknolojiyê yên Amerîkî û gelê Amerîkî hatiye kirin,” û Yekîtiya Ewropayê kir hedef.
Alîkarê Serokê DYE’yê JD Vance jî biryar rexne kir û parastina wê kir ku YE’yê li şûna piştgirîkirina azadiya derbirînê, “bi sedemên bêqîmet şirketên Amerîkî dike hedef.”
