2’emîn Konferansa Şaredariyên Gel ên Şengalê, piştî nîqaş, nirxandin û girtina biryarên girîng, bi hilbijartinê û xwendina encamnameyê bi dawî bû. Di hilbijartinê de Xwedêda Ilyas û Mariya Şengalî weke hevberdevkên giştî yên Şaredariyên Gel ên Şengalê hatin hilbijartin.
Di encamnameyê de hate diyarkirin ku wê Şaredariyên Gel ên Şengalê xwe di nav gel de bi rêya komînan ji nû ve ava bikin û yekîtiya komînên şaredariyên gel ên Şengalê hate ragihandin.
Berfirehiya encamnameyê bi vî rengî ye;
‘’Konferansa me di dîroka 30.11. 2025’an de, bi dirûşma “Em ê bi şaredariyên gel ava xwe, axa xwe û jiyana xwe komînal bikin” bi tevlîbûna 350 delegeyan bi coş û kelecaneke mezin destpê kir. Tevlîbûna hevserokên şaredariyên Mexmûr, Qendîl û peyamên ji şaredariyên gel ên Bakur-Rojhilatê Sûriyê hatî hêz û moraleke mezin da konferansa me. Konferansa me bi vê hêz û moralê destpê kir.
YEKÎTIYA KOMÎNÊN ŞAREDARIYÊN GEL DI HEMÛ BEŞÊN CIVAKÊ DE XWE BIRÊXISTIN BIKE
Rojevên di konferansê de hatin nîqaşkirin û xalên derketin pêş rêxistinkirina komînên demokratîk bû. Rêber Apo, komînên demokratîk weke çareseriya hemû pirsgirêkan daniye holê. Lewma şaredariya gel a Şengalê xwe ji nû ve bi navê “Yekîtîya komînên şaredariyên gel yên Şengalê” birêxistin kir. Li ser esasê ku şaredariya gel civakî bibe, hêz û îradeya gel derxê pêş di konferansê de sîstema xwe ya rêxistinî ji nû ve girt dest. Di vê bingehê de wê yekîtiya komînên şaredariyên gel di hemû beşên civakê de xwe bi rêxistin bike. Di nirxandinên Konferansê de hate diyarkirin ku li hemberî hişmendiya desthilatdar em ê bi yekîtiya komînên şaredariyên gel hişmendiya civaka demokratîk pêşbixin û xebatên hevpar esas bigrin.
KOMÎN ŞÊWAZÊ JIYANA CIVAKÊ BI XWE YE
Di konferansê de hate ziman ku komîn şêwazê jiyana civakê bi xwe ye. Civak ji bo hebûn û nirxên xwe yê madî û manewî ava bike her tim pêwîstî bi jiyaneke hevpar û komînal dîtiye û bi hezarî sala jiyan kiriye. Şaredariya gel jî perçeyeki ji vê jiyana komînal a civakî ye. Lê di roja îro de sîstemên desthilatdar şaredarî ji destê gel derxistiye û naveroka wê vala kiriye. Ji bo civakeke exlaqî, polîtîk, ekolojîk û azadiya jinê bê avakirin, yekîtiya komînên şaredariyên gel îradeya civakê ya xwe bi xwe rêvebirin û xizmetkirinê ji xwe re esas digre. Ji bo dewlemendiyên ser erd û bin erd bixe xizmeta civakê û hawirdorê xebat dike. Ji bona ku pirrengiya netewan, çand, ziman û baweriyan ava bike, hişmendiya xwişk-biratiyê pêş dixîne. Li ser esasê; em bi hişmendiya şaredariyên gel ên demokratîk, wekhev û azad ava bikin û pêşbixin, di konferansê de nîqaş, plansazî û biryarên girîng hatin girtin.
JIN PÊŞENGÊ AVAKIRINA YEKÎTIYA KOMÎNÊN ŞAREDARIYÊN GEL E
Konferansa me destnîşan kir ku jin pêşengê avakirina yekîtiya komînên şaredariyên gel e. Li ser vê bingehê di konferansê de rola jin bi berferehî hatiye nîqaş kirin. Di pêşxistin û rêxistiniya şaredariyên gel de rola jinê weke pîvaneke sereke hate diyarkirin. Ji ber ku şaredarî xwe dispêre civaka komînal û nirxên demokratîk, wekheviya jin û mêr esas digre. Ji bo pirsgirêkên di navbera jin û mêr de ji holê rabin konferansa me, bal kişand ser sîstema hevserokatiyê ev ji weke modêla çareseriyê esas digre.
ŞAREDARÎ DI VEGERA GEL DE BI ERKA XWE RABÛN
Di konferansê de xebatên 11 salan ên şaredariya gel hatin nirxandin. Di encama nîqaşên konferansê de şaredariya gel tevî ku di bin şert û mercên zehmet yên karkirinê jî hewl daye ji pêwîstiyên gel re bibe bersiv. Şaredarî, di vegera civaka Êzidî ya li cih warê xwe de, bûye xwedî rolekî girîng. Li hemberî siyaseta koçberiyê û fermana spî bi xebatên xwe ji bona jinûve avabûna Şengalê hemû derfetên xwe seferber kiriye. Her wiha di konferansê de rexnedayîna nebesiyên heyî hatiye dayîn û ji bo ku xebat hîn werin berfirehkirin konferansê hedef daniye pêşiya xwe. Ji niha û pêde wê yekîtiya komînên şaredariyên gel ne tenê projeyên xizmetgûzariyê wê di heman demê de aliyê perwerdehî, rojên çandî û huneri, zindîkirina cih û warên dîrokî, derfetên xebatên jinan, projeyan pêş bixîne û bike malê civakê.
Li ser vê bingehê biryar, plansazî hedefên ku konferansê daniye pêşiya xwe, wê yekîtiya komînên şaredariyên gel di pêvajoya nû de bi hemû hêz û derfetên xwe pêk bîne. Em ê, bi ruhê jiyana komunal û demokratîk di astê pêngavî de xebatên xwe mezin û berfireh bikin û ji bo azadî û xweseriya Şengalê bikin bingeh.’’
2’emîn Konferansa Şaredariyên Gel ên Şengalê, bi coş, moral û biryardariyeke xurt û bi dirûşmeya ‘’Bijî Rêber Apo’’ bi encam bû.
