Yên ku tevlî bîranînê bûn, parlamenterê Çewligê yê DEM Partiyê Omer Faruk Hulaku, parlamenterê Mêrdînê George Aslan, Rêxistina DEM Partiyê ya Bajarê Mereşê û endamên Egitim Senê kirin. Heyetê serdana Goristana Kapıçamê û goristanên gundên Çîgilî û Alibey Uşagi kir û qaranfîl danîn ser goran. Li cemxaneyên gundan loqme hatin belavkirin.
Serokê Şaxê Mereşê yê Egitim Senê Îsmaîl Tekardiç di daxuyaniya çapemeniyê ya li Bazarcixê de axivî û diyar kir ku hejmara kesên di erdhejê de jiyana xwe ji dest dane tu carî bi awayekî zelal nehatiye eşkere kirin.
Tekardiç bi bîr xist ku li gorî daneyên fermî 53 hezar û 537 kesan jiyana xwe ji dest dane û 107 hezar û 213 kes birîndar bûne; her wiha diyar kir ku bi milyonan kes jî bi pirsgirêka stargehê re rû bi rû ne.
Tekardiç bal kişand ser wê yekê ku erdhej bi gotinên “çarenûsê” hatine piştguh kirin û got ku berpirsên rastî hatine parastin û bi dozên nîşandêr sûc xistine stûyê çend muteahîdan.
Tekardiç got: “Tenê cihê felaketê guheriye. Dema berpirsên rastî dihatin parastin, bi dozên nîşanderî sûc li ser milê çend muteahîdan hatine hiştin. Bi efûyên îmarê, avahiyên xirabe hatin zagonîkirin û bi destê dewletê mirin ji nû ve hate hilberandin.”
Di daxuyaniyê de bang hate kirin ku avahiyên cemaweriyê bi pîvanên zanistî werin kontrolkirin, bacên erdhejê li gorî armanca xwe werin bikaranîn, polîtîkayên bi navendî rantê bi dawî bibin û bi beşdariya rêxistinên pîşeyî “Zagona Erdhejê” ya girêder were amadekirin
