Fermandariya Giştî ya Yekîneyên Parastina Jin (YPJ) bi daxuyaniyeke nivîskî şehadeta şervana xwe Destan Rojhat ragihand.
Daxuyanî wiha ye:
“Em di kesayeta şervana xwe Destan Rojhat de hevreyên ku di berxwedaniya sedsalê ya Bendava Tişrînê de bi ruhekî fedayî şer kirin û gîhiştine asta şahadetê, bi bîr tînin û soz û peymana ku doza azadiyê gihandina serkeftinê nû dikin.
Ji 27’ê Mijdara 2024’an û şûn de dewleta Tirk a dagirker û çeteyên girêdayî wî bi konseptekî nû êrîşên xwe li ser Sûriyeyê û Rojavayê Kurdistanê dijwartir kirin. Bê guman armanca çeteyên dewleta Tirk a dagirker ne tenê dagirkirina Şehba, Til Rifat û Minbic bû. Armanca wan di giştî sînorên Misakî Mîllî de hegemonyaya xwe nûjenkirin bû. Bendava Tişrînê îro şahîdî ji gelek qehremaniyan re dike. Şervan û gelên heremê îro mil dane hevdû û dibin mînakên şerê gel ê şoreşgerî. Ji 7 heya 70 salî mirovên vê axê bedena xwe kirine bendavekî ku tu caran ji hevdû qut nabe.
Şervana YPJ’ê Derya Hecî bi nasnav Destan Rojhat, dema ku di eniyên herî pêş ên Bendava Tişrînê de li beramberî çeteyên dewleta Tirk a dagirker şer dikir, di 8’ê Çileya 2025’an de bi êrîşên balafirên şer gihîşt şehadetê. Di serî de em ji malbata welatparêz a şehîd Destan Rojhat re, ji hemû gelan û rêhevalên xwe re sersaxî dixwazin. Di kesayeta wan de hemû şehîdên Bendava Tişrîn û Qeraqozaxê bi bîr tînin. Em diyar dikin ku em ê tu caran xeyalên wan nîvço nehêlin û xwe bigihînin Rêbertiya Azad û welatekî azad ku hemû netewe û ol bikaribin tê de bijîn.
Şervana me ya YPJ’ê Destan Rojhat di sala 2004’an de li Kobanê ji dayik dibe. Ew di nav malbateke welatparêz de mezin dibe. Malbata wê xwedî gelek şehîd in. Ji ber vê yekê Rêheval Destan bi destanên qehremaniyê mezin dibe. Ew bi van destanan dibe xwedî dilekî pak. Li ser têşe girtina kesayeta Şehîd Destan Serhildana Qamişlo û berxwedana rumetê ya Kobanê bandorek mezin çêdike. Şehîd Destan di wê berxwadanê de dikeve ferqa hêza jin ku dikare serkeftinê bi peşengiya xwe bi afirîne.
Di sala 2021’an de rêheval Destan tevlî YPJ’ê dibe. Di tevlîbûna rêheval Destan de şerê Serêkaniyê û Girê Spî bandoriyekî mezin ava dike. Piştî ku tevlî refên azadiyê dibe ew kesayeta xwe û civaka ku tê de mezin bûye baştir dahûrandin dike. Ew wek jin xwe di rastiya Rêber Apo de zêdetir nas dike. Ji bo jiyanîkirina fîkrên Rêber Apo ên der barê jin de dibe xwedî biryarekî bi wate. Dîsa sosyolojiya civaka ku tê de mezin bûye baştir dahûrandin dike.
Rêheval Destan bi heskirina xwe ya jiyanê her tim dibe moralê hevalên xwe. Ew di her kêliya jiyanê de dibe xwedî kedekî bêhempa. Di nav hevalên xwe de bi dilnizmbûna xwe û dilpakbûna xwe tê naskirin. Piştî ku perwerdeyên leşkerî û bîrdozî dibîne di kesayeta xwe de sekna jina şerker dide avakirin. Ew di jiyan û şerê xwe de dibe xwedî ezmûnên YPJ’ê yên 12 salan. Ew dibe yek jî mînaka herî şênber a berxwedana Bendava Tişrînê. Şervana me ne tenê di jiyanê de di şerê xwe de jî bi wêrekî û vîna xwe derdikeve pêş. Ew di vê zanebûnê de ye ku parastina Bendava Tişrînê parastina Bakur û Rojhilatê Sûriyeyê ye. Rêheval Destan Rojhat ala ku ji Arîn Mîrkanan dewr girtî rakir asîmanên herî bilind. Ew bû Arîna nûjen a welatê xwe.
Van şehîdan hişt ku em îro 12’emîn salvegera damezrandina YPJ’ê pîroz bikin. Em ê wek YPJ’ê her tim li mîrateyên van şehîdan xwedî derbikevin. Yên ku rêya me ronî dikin şehîdên me ne, ji bo vê em ê di ronahiya wan de heya ku doza azadiya jinan û gelan bi serkeftinê tacîdar nekin nesekinin.”
Nasnameya şehîd:
Nav û Paşnav: Derya Hecî
Nasnav: Destan Rojhat
Navê Dayiik: Necme
Navê Bav: Hesen
Cih û Dîroka Şehadetê: 08.01.2025/Bendava Tişrînê.
