Şengaliyên ji ber fermanê ji warê xwe koçber bûn û 11 sal in li Başûrê Kurdistanê bûn, pêl bi pêl li warê xwe vedigerin.
Piştî demeke dirêj ku rê li ber girtina vegera koçberên Êzidî hatibû girtin, pêla vegera ber bi herêma Şengalê ve careke din bi rengekî fermî destpê kir. Di vê çarçoveyê de, îro 150 malbatên Êzidî ji wargehên penaberiyê yên li Başûrê Kurdistanê bar kirin û li ser cih û warên xwe yên qedîm bi cih bûn.
Ev pêngava koçberan weke pêngava yekem tê nirxandin û tê payîn ku di nava vê hefteyê de hejmara malbatên vedegerin ji 600’î derbas bibe.
Li gorî aliyên peywendîdar, ev qonax wê dewam bike û di demên pêş de pêlên nû yên vegerê jî destpê bikin.
Tevî vê gavê jî, li gorî zanyariyan hîn zêdetirî hezar malbatên din li benda vegerê ne, lê ji ber astengkirina kaxez û belgeyên wan ên fermî, heta niha destûr ji bo vegera wan nehatiye dayîn.
