Platforma Yekitiya Jinên Kurd a Bakur encamnameya 3’yemîn konferansa xwe aşkera kir û got: “Yekitiya neteweyî, têkoşîna çand û zimên, parastina jiyana azad û pêşengtiya jinan a di avakirina aştiyê de hîmên bingehîn yên vê serdemê ne. jin dê di avakirina civaka demokratîk de roleke sereke bilîzin.”
Platforma Yekitiya Jinên Kurd a Bakur, di 21-22’yê Hezîranê de li Amedê bi dirûşma “Bi yekitiya jinên Kurd, ber bi yekitiya neteweyî ve” û bi beşdariya 101 delegeyan li dar xist. Encamnameya konferansê li Odeya Bazirganî û Pîşesaziyê ya Amedê (DTSO) hat aşkerakirin. Kurdiya encamnameyê, ji hêla Hevşaredara Bajarê Mezin a Mêrdînê Devrîm Demîr ve ku li şûna wê qeyûm hatiye tayînkirin, hate xwendin.
Encamname wiha ye:
“Konferansa me, bi armanca ku rol û mîsyona Jina Kurd a di warê avakirina yekitiya neteweyî, parastina çand û zimanê Kurdî, parastina nirxên civakî û avakirina pêvajoya aştî û civaka demokratîk binirxîne û bi îradeyek hevpar nexşeriyeke têkoşînê diyar bike civiya.
Dîrok bi berxwedêriya jinê bi wate bûye; ax di destê wê de veguheriye hilberînê. Jin; a ku dengê xwezayê bihîstiye, jiyan bi hîsek bêdawî xwedî kiriye û her aştî parastiye. Ev heqîqeta ku di bîra berxwedanê ya jinên Kurd de veşartî ye, îro bûye çirûska riya azadiya mirovahiyê jî.
JIN BÛNE TIRSA HERÎ MEZINA DESTHILATDARIYA NÊR
Têkiliya ku bi xwezayê re ava kiriye ne tenê ji bo domandina jiyanê ye; di heman demê de bingeha wateyê, bereketê, çerxîbûn û hebûna kolektîf e. Di vê gerdûna ku ax dayik e, av jiyan e, agir giyan e û hewa gotin e de, jin bûne zimanê hevpar, dengê hevpar û wijdanê hevpar yê hemûyan. Ji ber vê sedemê, jin bûye hedefa yekem a zîhniyetên serdest û pergalên tehakûmê; ji ber hebûn û hêza wê ya birêxistinkirina jiyana azad de, bûye tirsa herî mezin a desthilatdariya nêr.
BÊYÎ AZADIYA JINÊ AŞTÎ PÊKAN NABE
Jina Kurd, di tevahiya dîrokê de hem li dijî kolonyalîzmê û hem jî li dijî desthilatdariya patrîyarkal têkoşiya ye; bedena xwe, nasnameya xwe û xwezaya xwe parastiye û pêşengtiya rêwîtiya azadiya gelekî kiriye. Ev konferans, banga veguhêstina mîrateyeke qedîm a ji rabirduyê ber bi dahatuyê ve ye. Banga mezinkirina rola jinê ya di avakirina aştî û birêxistinkirina civakî de ye. Ji ber ku em baş dizanin; heta jin azad nebin civak azad nabe, heta xweza neyê parastin jiyan ava nabe û aştî beyî jinê pêk nayê.
Di pêvajoyeke ku Rojhilata Navîn ji nû ve tê dîzaynkirin û şer û pevçûnên li ser gel, ol û baweriyan pêk tên de lidarxistina vê konferansê hêviyên me jinan ên ji bo siberojê, mezintir dike. Desthilatdarên cîhan û herêmê, çawa ku bi sedan sal e li ser erdnîgariya herêmê û bi taybetî jî li ser Kurdistanê ji bo berjewendiyên xwe, bûne sedema qirkirina çand, ziman, nasname û baweriya gelan û her wiha talan û tunekirina xwezayê, polîtîkayên xwe îro jî didomînin.
ŞERÊ ÎSRAÎL-ÎRANÊ Û FIKARÊN TIRKIYEYÊ
Îro şerê herî germ, şerê di navbera Îran û Îsraîlê yê ku îro Amerîka jî tevlî bûye, Tirkiye jî di nav de çavê hemû cîhanê li ser vî şerî ye. Ev tabloya Rojhilata Navîn ku bi salan berê rêzdar Abdullah Ocalan bi pêşbîniyên xwe yên siyasî pênase kiribû û wek Şerê 3’yemîn ê Cîhanê bi nav kiribû, aşkeraye ku îro herî zêde Tirkiye jê bi fikar e. Ew jî dizane ku ger dev ji zext û polîtîkayên tunekirina gelan bernede û di çerçoveyek demokratîk de maf û azadiyan nas neke, dê ji rewşa şer xelas nebe û dor were wê.
NEXŞERÊYA ÇARESERIYÊ BANGA ABDULLAH OCALAN E
Wek hemû netew-dewletên ku ji bo parastina hebûna xwe li rêbazên cur be cur digerin, Dewleta Tirk jî îro ji bo ku xwe ji vî şerê ku navenda wî Rojhilata Navîn e biparêz e, polîtîkayên xwe yên qirkirin û tunehesibandinê ku ev sed sale li ser Kurdan dimeşîn e di asteke cuda de nîqaş dike û bi rêzdar Abdullah Ocalan re hevditinan dike. Nexşerêya ku di serî de gelê Kurd û hemû gel û baweriyên cuda pê bibin xwedî mafê hevpar û wekhev yên jiyanî û nasnameyî, nexşerêya ku rêzdar Abdullah Ocalan di 27’ê Sibatê de bi navê ‘Avakirina Aştî û Civaka Demokratîk’ îlan kir e. Erk û berpirsiyariya me Jinên Kurd jî ew e ku em ji bo mîsogerkirina daxwaz û mafên gelê xwe, li vê bangê xwedî derkevin.
FELSEFEYA ‘JIN JIYAN AZADÎ’ DIKARE ŞER BI DAWÎ BIKE
Em jin dizanin ku zîhniyeta partriyalkar li ser bingeha şer û tundiyê ava bûye û roj bi roj vê pergala xwe xurt dike û wê dide jiyîn. Têkoşîna ku heta niha jinan bi hêza xwe ya cewherî ya bi felsefeya ‘Jin, Jiyan, Azadî’ li hemberî zilm û zordariya vê pergalê dane, dikare komkujiya li ser gelan, şer û tundiya nava civakê jî rawestîn e û rê li ber aştiyê veke..
BIRYARÊN HATINE DAYÎN
Di encama nîqaşên me yên du rojan de biryarên derketine holê ev in;
* Yekitiya Jinên Kurd: Pêdiviyên wê yên dîrokî û aktuel biryarên konferansa me
Têkoşîna jinên Kurd a di warê neteweyî, çandî û civakî de encama mîrateya berxwedaneke dîrokî û pêdiviyên siyasî yên heyî ye. Îro avakirina Yekitiya Jinên Kurd jî ji tercîhekê wêdetir, berpirsiyariyeke dîrokî ye ku divê her jinek Kurd bi vê berpirsyariyê li hemberî her cure polîtîkayên înkar, qirkirin û bişaftin yên li ser gelê Kurd têbikoşe ye. Konferansê biryar da ku dê ev yekitî li ser bigeheke ku sînoran derbas bike, tecrûbeyên jinên Kurd ên li her çar aliyê Kurdistanê li hev bicivîn e, birêxistinkirina xwe xurt bike, avabûyîna xwe ji nû ve binirxîne û ji bo avakirina yekitiya neteweyî bibe hêza herî dînamîk û veguherîner.
* Mîsyona jinê ya di parastin û veguhastina çanda Kurdî de
Jina Kurd ku hilgira çanda Kurdî, hêza wê ya afirîner û veguhêzkar e, di heman demê de xwedî berpirsiyariyeke dîrokî ya ku wê mîrateyê bigihîne nifşên nû. Jin divê rola xwe ya kirdebûyîna afirîner û veguhêzkar a çandê bilîz e. Ji dengbejiyê heta cil û bengên gelêrî, ji xwarinê heta folklorê her parçeyekî nasnameya Kurdîtiyê bi keda jinê hatiye honandin. Konferansa me biryar da ku em jin di warê hilberîna çandî de roleke mezintir bigirin û pergalên zanîna kevneşopiyên çandî û zayendperestî ji hêla jinan ve ji nû ve bên vejînin. Herwiha ji bo hevgirtinek çandî û hunerî her sal bi awayekî rêk û pêk li aliyekî Kurdistanê mihrîcanên neteweyî yên çandî û hunerî bên lidarxistin.
* Rola jinê ya di parastin û pêşxistina zimanê Kurdî de
Jiyîn û pêşketina zimanê Kurdî bingeha nasnameya neteweyî ye. Jin xwedî roleke navendî ya ku, ji veguhestina zimanê nava malbatê bigirin heta perwerdehiyê, ji wêjeyê bigirin heta hilberîna medyayê derdikeve pêş e. Konferansa me biryar da ku di vê çerçoveyê de, jin bi berpirsiyariya ku zimanê Kurdî ragihînin nifşên nû, her jinek bibe kirdeya înîsiyatîfên herêmî yên zimanê Kurdî, wan di nava torekê de bîcivîne, têkoşîna zimanî berfireh bike, li hemberî nêzîkatî û hişmendiya ku ‘zîmanê Kurdî zimanekî kêm e, ne zimanê zanistê ye’ têbikoşe û bibe parêzvana herî xurt a doza daxwaza perxwerdehiya bi zimanê dayikê û misogerkirina zimanê Kurdî. Divê zimanê Kurdî bibe zimanê perwerdehiyê û ji gelê Kurd re statû.
* Têkoşîna li dijî tundiya li ser jinê û polîtîkayên qirkirinê
Tundiya piralî ya li ser jinên Kurd, ne tenê li ser bingeha zayendî ye; di heman demê de xwedî aliyekî neteweyî, çînî û siyasî ye jî. Polîtîkayên ewlekariyê yên dewletê, mîlîtarîzm, xizanî, koçberiya bi darê zorê û bişaftina çandî, beden û jiyana jinên Kurd dorpêç kirin e. Konferansa me biryar da ku hişmendiya xweparastinê di asta herêmî û neteweyî de li dijî van êrişên piralî bilind bike, torên hevgirtina jinan xurt bike û xetek têkoşînê ya hevpar ava bike. Ne tenê têkoşînek zagonî, di heman demê de têkoşîneke civakî ya birêxistinkirî dikare li dijî tundiyê bibe bingehek xurt.
* Mîsyona jinê ya di avarina aştî û civaka demokratîk de
Jinên ku di rewşên şer de berdêlên herî giran ew didin, di heman demê de damezirînerên aştî û jiyana demokratîk in. Em jinên Kurd, dibêjin ku divê li gel bêdengkirina çekan, pêvajoya aştiyeke bi rûmet û mayînde ku edalet tê de were sazkirin û maf li ser bingeha hemwelatîbûna wekhev werin misogerkirin jî dest pê bike. Konferansa me diyar kir ku yek ji armanca herî sereke ew e ku ev platform di pêvajoya avakirina civakeke demokratîk a ku li ser bingeha perspektîfa rêzdar Abdullah Ocalan a demokratîk, ekolojîk û azadiya jinê roleke çalak bigire û hevgirtina jinan a herêmî, neteweyî û navneteweyî di vî warî de zêde bike.
ENCAM Û BIRYARDARÎ
3’yemîn Konferansa me; bi hevberkirina bîra jina Kurd a kolektîf, tecrûbeyên xwe yên têkoşînê û hêviya xwe ya siberojê serdemek nû îlan dike. Yekitiya neteweyî, têkoşîna çand û zimên, parastina jiyana azad û pêşengtiya jinan a di avakirina aştiyê de hîmên bingehîn yên vê serdemê ne.
Ew hêz û tecrûbeya têkoşîna jina Kurd ku pê gihîştiye vê astê, dikare di avakirina civakeke demokratîk de jî roleke sereke bilîz e. Bi jina azad, civaka azad. Bi çand û zimanê azad, nasnameya azad misoger dibe. Bijî yekitiya jinên Kurd! Bijî têkoşîna hevpar a jinên Kurd! Jin, jiyan, azadî!”
