Li bajarê Dortmund ê Elmanyayê wê Festîvala Çanda Kurd a Navneteweyî ya 33’emîn di 13’ê Îlonê de pêk were. Çalakiya ku wê li navnîşana ‘Remydamm/Victor-Toyka Str. 44139’ bê lidarxisitn wê ruhê çand, huner û berxwedanê yê Kurdên li Ewropayê bigihîne hev.
Hevserokên KON-MED’ê Rûken Akça û Kerem Gok têkildarî amadekarî û naveroka festîvalê daxuyanî dan.
RÛKEN AKÇA: ÇANDA ME TEMÎNATA PAŞEROJA ME YA AZAD E
Hevseroka KON-MED’ê Rûken Akça bal kişand ser girîngiya dîrokî û çandî ya festîvalê û got, “Têkoşîna me ku bi pêşengiya Rêber Apo hate destpêkirin û zêdeyî çil salan dewam kir, weke têkoşîna hebûn û azadiyê ya gelê Kurd derkete ser dika dîrokê. Ev têkoşîn ne tenê li Kurdistanê, her wiha li çar aliyên Ewropayê jî îradeya gelê me mezin dike. Wezîfeya me ya îro ew e ku yekîtiya xwe ya neteweyî xurt bikin, di nava şert û mercên dîasporayê de hîn bêhtir xwedî li çand û zimanê xwe derkevin. Ji ber ku çanda me ne tenê nasnameya me ye di heman demê de temînata paşeroja me ya azad e.”
Rûken Akça ragihand ku festîval her sal bi dirûşmekê tê lidarxistin û destnîşan kir ku mijara îsal ‘Aştî û civaka demokratîk’ e. Akça diyar kir ku festîval ne tenê muzîk e, di heman demê de nîşaneya îradeya gel, çand, nasname, huner e.
Di festîvalê de ji standên ji mutbexa Kurd a kevneşop heta bi qadên danasîna kincên neteweyî; ji çalakiyên ji bo zarokan û pirtûkan heta bi konên dengbêjiyê wê gelek beş hebin.
Rûken Akça got, “Festîvala ku wê 13’ê Îlonê li Dortmundê bê lidarxistin wê bibe nîşaneyeke xurt a biryardariya gelê me û yekîtiya neteweyî. Bnaga me li gelê me û dostên me yên li Ewropayê ye: Werin em bi çanda xwe û kincên xwe yên neteweyî li Dortmundê li hev bicivin. Werin em têkoşîna xwe ya azadî û wekheviyê mezin bikin.”
KEREM GOK: EM BIBIN BERSIV JI BANGA AŞTÎ Û CIVAKA DEMOKRATÎK RE
Hevserokê KON-MED’ê Kerem Gok jî anî ziman ku amadekariyên festîvalê beriya bi mehan bi hesasiyeteke mezin hate meşandin. Gok ragihand ku pêvajoya burokratîk qediya ye, bingeha ewlekarî û ragihandinê hatiye danîn û ji bo bersivdayina li pêwîstiyên beşdaran sererastkirin hemû hatine kirin.
Hevserokê KON-MED’ê got, “Me bernameyeke hunerê ya dewlemend amade kir ku gelek hunermendên hêja wê bi zaravayên Zazakî, Kurmancî û Soranî berhemên xwe pêşkêş bikin. Bi armanca danasîna çanda Kurd bi navê Konê Amele wê konek hebe. Ji bo zarokan jî wê konê Zarok Ma hebe. Li gel govend û çalakiyên din ên çandî festîval wê têr û tijî derbas bibe.”
Gok diyar kir ku gelê Kurd salên dûr û dirêj bi polîtîkayên asîmîlasyonê re rû bi rû ye û anî ziman ku li nava şert û mercên dîasporayê festîval li gel çandê her wiha xwedî wateyeke siyasî ye.
Gok got, “Gelê Kurd li welatê xwe hate qedexekirin, gund hatin valakirin, tinekirin li ser ziman û çanda wê hate ferzkirin. Bi polîtîkayên asîmîlasyonê hewl dan nirxên gelê me bidin jibîrkirin. Gelê me yê hat dîasporayê li hemberî van polîtîkayan li ber xwe da. Tevlîbûna li festîvalê di heman demê de tê wateya rabûna li ber asîmîlasyon, bêstatubûn û zilmê. Ji ber vê yekê banga me li gelê me ye: Xwedî li paşeroj, zarokên xwe derkeve Bi taybetî divê jin û ciwanên me bi kincên xwe yên neteweyî ber bi Dortmundê ve biherikin û bersiveke xurt bidin banga aştî û civaka demokratîk a Rêber Apo.”
