Dewleta Tirk a dagirker di 24-25’ê Cotmehê de bi balafirên şer û balafirên bêmirov û biçek êrîşî Şengalê kir û di encama van êrîşan de 6 şervanên YBŞ’ê şehîd bûn. Îro ji aliyê Rêveberiya Xweser a Şengalê ve li Şehîdgeha Şehîd Dilgeş û Şehîd Berxwedan merasîmek hat lidarxistin û şehîd hatin bibîranîn. Li gel malbatên şehîdan, sazî û rêxistinên Şengalê bi sedan xelkê Şengalê jî tevlî merasîmê bûn.
Merasîmê bi deqeyek rêzgirtinê destpê kir. Di merasîmê de li ser navê Fermandariya YBŞ’ê Rêber Feqîr axivî û diyar kir ku hevalên wan ên ku di van êrîşan de şehîd ketine, ji bo ku rê li ber fermanan bigirin û civaka xwe biparêzin çek rakiribûn. Rêber Feqîr bi bîr xist
xist ku ev ne cara yekem e ku Şengal rastî êrîşên qirkirinê tê û axaftina xwe wiha domand: “Pêwîst e em bizanin ku tevahiya van êrîşên ku li ser me tên kirin hemû berdewamiya fermanê ne. Hedef ji van êrîşan ne YBŞ ye, lê belê tunekirina gelê Şengalê ye. Dixwazin ev civak bê hêz û parastin bimîne û dewleta Tirk projeya xwe ya Osmaniya Nû li ser herêmê pêk bîne. YBŞ’ê tenê erka parastina vê civakê girtiye ser milê xwe. Em dibînin hevalên me yên ku ji dema fermanê ve ji bo parastina gelê xwe çek rakirine dibin hedefa dewleta Tirk û hevkarên wan ên xayîn.”
‘PÊWIST E HER KES XWE AMADEYÎ ÊRÛŞAN BIKE’
Rêber Feqîr li hemberî êrîşan banga xurtkirina têkoşînê li gelê Şengalê kir û wiha dewam kir: “Îro roja xîretê ye, fermana li ser Şengalê her berdewam e, tu hêviya me ji tu hêzeke din nîne.
Erka hêzên me YBŞ-YJŞ û Asayîşa Êzdîxanê parastina vî gelî ye. Pêwîst e gelê me bizane ku ev bedelên em didin ji bo vî gelî ne, pêwîst e her kes bizane ku ji bo parastina vî gelî em canê xwe feda dikin. Bi sedan şehîdên me yên pêşeng ji bo vî gelî canê xwe dan lê pêwîst e em ji her tiştekî re amade bin. Ji ber ku me parastina vî gelî daye ser milê xwe, wê êrîş û êşên mezin werin. Tu hêviya me ji hikûmeta Iraqê nîne û nemaye jî. Ji ber ku ne tenê li Şengalê, li gelek cihan serweriya Iraqê tê binpêkirin, lê Iraq bêdeng e. Loma pêwîst e hêviya me tenê bi gelê me hebe. Heger em parastina xwe bi xwe mayînde nekin wê tu kes me neparêze. Lazim e ne tenê hêzên leşkerî, tevahiya gelê me ji her êrîşê re amade be.”
‘ME ÇAWA ŞENGAL RIZGAR KIR EM Ê WISA JÎ BIPARÊZIN’
Ji Fermandariya YBŞ’ê Rêber Feqîr di dawiya axaftina xwe de da zanîn ku ew ê tola şehîdan li erdê nehêlin û got: ‘’Pêwîst e em ji xwe bawer bin ku çawa me Şengal ji DAIŞ’ê rizgar kir em ê wisa Şengaleka xweser û azad jî ava bikin. Gelek kes hene em dizanin ku destê wan di xwîna şehîdan de heye û ji aliyê PDK’ê û MÎT’ê ve hatine perwerdekirin. Em bang li gelê xwe dikin ku wan kesan di nava xwe de nehêlin. Bila dost û dijminê me jê piştrast bin ku her kesekî ku destê wan di xwîna hevalên me de heyî em ê teqez hesabê ji wan bipirsin.”
‘EM Ê TÊKOŞÎNA XWE NÎVCO NEHÊLIN’
Piştî axaftina Rêber Feqîr, berdevka Koordinasyona TAJÊ Riham Hico axivî. Riham Hico bal kişand ser êrîşên bênavber ên li ser Şengalê û wiha axivî: ‘’Em dibînin ku gelek kes hene ku hebûna YBŞ’ê dikin hincet ji bo van êrîşan.Lê pêwîst e her kesek bizane ku ev kesên ku niha tên hedefgirtin, gele me bi saya serê wan vegeriya ser axa xwe. Dewleta Tirk dixwaze projeyên xwe li Iraqê bibe serî. Her hêza ku li ber projeyên dewleta Tirk asteng e, tê hedefgritin. Lê em vê peyamê didin; em li ser xeta bi sedan şehîdan, li ser xeta Rêber Apo ne. Têkoşîna me daye destpêkirin em ê nîvco nehêlin, têkoşîna ku me heya vir aniye em ê bigihînin serkeftinê. Di van êrîşan de zarokên Êzîdî û yê gelê me yê Ereb bi hev re şehîd ketin. Ev ji me re cihê serbilindiyê ye, ev wê peyamê dide ku pêkvejiyan hêzê bi xwe re tîne. Çawa ji dema fermanê heya niha em xwe diparêzin, ji niha û şûnde jî em ê mafê xwe yê xweparastinê bi cih bînin.”
‘EM Ê XEYALÊN ŞEHÎDAN PÊK BÎNIN’
Di merasîmê de li ser navê Rêveberiya Xweser Xwedêda Ilyas axivî. Xwedêda Ilyas destnîşan kir ku hemû şehîdên tên dayîn ji bo Şengaleke xweser û azad e û wiha berdewam kir: ‘’Bi sedan salan e em ji bo hebûna xwe bedelan didin. Lê pêwîst e her kesek bizane ku hebûna me ya li ser vê axê bi saya keda van şehîdan e. Niha li Şengalê gel vegeriyeye ser axa xwe û gelên Şengalê bê cûdahî bi hev re dijîn. Ev pêkvejiyana ku li Şengalê heye bûye kelem di çavê dijmin û neyaran de. Îro dem hatiye ku em hedefa şehîdan a yekîtiya gelan pêk bînin. Çawa Mam Zekî, Hevalê Saît û bi dehan şehîdên din, dest bi xebatên Şengala xweser û azad kirin, em soz didin em ê vê xeta ku şehîdan daye pêşiya me bibin serî.”
Malbatên şehîdan jî di peyamên xwe de diyar kirin ku şehîd ne tenê yên wan in, ew şehîdên hemû Şengalê ne û banga xurtkirina hêzên parastina cewherî kirin. Piştî axaftinan wesîqeyên şehîdan radestî malbatên wan hatin kirin û merasîm bi dirûşmeya “Şehîd namirin” û “Bijî berxwedana Şengalê” bi dawî bû.
