8’ê Adarê Roja Jinên Kedkar ên Cîhanê li paytexta Awûstûrya Viyana, bajarên Graz, Vorarlberg û Lînzê bi coş hat pîrozkirin. Çalakî bi pêşengiya Meclisa Jinê ya Avesta bi dirûşma “Em bi Jin, Jiyan, Azadî ber bi Şoreşa Jinê ve dimeşin” hatin lidarxistin.
VIYANA
Jinên li Neûbagasse yê Viyanayê li hev civiyan û heta Westbahnhofê meşiyan. Girse beriya meşê govend gerand û bi tilîlî û dirûşmên “Jin, Jiyan, Azadî” berz kirin. Welatiyên derdorê jî tevlî vê coşê bûn û dirûşma Elmanî ya “Frauen, Leben, Freiheit” piştgirî dan çalakiyê.
Beriya meşê li ser navê Meclisa Jinê ya Avestayê Nurcan Guleryuz axivî û diyar kir ku 8’ê Adarê ne tenê roja bîranînê ye, sembola berxwedana li dijî pergala baviksalarî, kapîtalîzm û zîhniyeta netewe-dewletê ye.
Nurcan Guleryuz diyar kir ku jin di avakirina civakeke demokratîk û ekolojîk de rola pêşeng dilîzin û têkoşîna femînîst a li cîhanê her diçe mezin dibe û got: “Bihar sembola jiyan, azadî û hêviyê ye. Wê bi berxwedana jinan şîn bibe.”
Nurcan Guleryuz bal kişand ser şoreşa jinan a li Rojava û got, dirûşma “Jin, Jiyan, Azadî” ne tenê li Rojhilatê Kurdistanê, li tevahiya cîhanê jinan teşwîq kir û cesaret da wan ku xwe bi rêxistin bikin. Guleryuz bal kişand ser peyama Rêber Apo ya di 27’ê Sibata 2025’an da û diyar kir ku hêviya aştiyê ji bo Kurdan û gelên Rojhilata Navîn çêbûye. Guleryuz bang li her kesî kir ku ji bo jiyanek azad û wekhev têkoşîna xwe berfireh bikin.
Piştî axaftinê girseyê dest bi meşê kir. Di meşê de wêneyên Sara, Rojbîn û Ronahî yên di sala 2013’an de li Parîsê hatin qetilkirin hatin hilgirtin. Her wiha pankartên ku wêneyên Rêber Apo li ser bûn jî di meşê de hat hilgirtin. Meş bi dirûşmên “Jin, Jiyan, Azadî” û “Bijî Serok Apo” bi dawî bû.
Hat diyarkirin ku çalakiyên 8’ê Adarê wê sibe li Ternîtzê berdewam bike.
GOTZIG
Çalakiya 8’ê Adarê ji aliyê Komeleya Çandê ya Sara ve li Gotzis a eyaleta Vorarlbergê hate lidarxistin. Gelek jin bi cil û bergên Kurdî beşdarî çalakiyê bûn. Çalakî bi deqeyek rêzgirtinê destpê kir û piştre sînevîzyon hate pêşandan û li ser jiyana Sakîne Cansiz axaftin hatin kirin. Çalakî bi konsera muzîkê û pêşkêşkirina xwarinên herêmî berdewam kir. Çalakî bi gerandina govendê bi dawî bû.
GRAZ
Ji Şaredar Grazê Elke Kahrê re desteyeke gulan a ku gotina Rêber Apo ya ‘’Jin baxçeyê veşartî yê azadiyê ne’’ li ser heyî haye da yîn. Piştre li gel jinên Kurd suhbeteke kurt hate kirin.
Her wiha li gel hemû rêxistinên jinan ên li Grazê jî meşek hate lidarxistin. Gelek kes beşdarî meşê bûn û meşê li Sudtirolerplatzê dest pê kir û Hauptplatzê bi dawî bû. Di tevahiya meşê de dirûşmeyên “Jin, Jiyan, Azadî” û “Bijî Berxwedana Rojava” hatin berzkirin.
LINZ
Li bajarê Linz ê Avûstûryayê di çarçoveya 8’ê Adarê de bi hezaran jin kom bûn. Çalakî bi banga Frauen Forum, Meclîsa Jinan a Linzê, Platforma Jinan a Roza û Bloka Şoreşger a Antîfaşîst hate lidarxistin û jinên Kurdistanî, Tirkiyeyî, Kubayî, Arjantînî û Îranî jî di nav de ji 67 neteweyên cuda bi tevahî 4 hezar 500 kes beşdarî çalakiyê bûn.
Çalakî li mezintirîn parka bajêr, lu Volksgardenê hate lidarxistin û têkildarî girîngî wateya 8’ê Adarê axaftin hatin kirin. Jina Kubayî Kim Razyan li ser navê Bloka Şoreşger axivî û banga Rêber Apo silav kir û bal kişand ser girîngiya piştgiriya jinan û ev yek anîn ziman: ‘’Şerên li Rojhilata Navîn her ku diçin kûrtir dibin û bedêlên herî giran dîsa ji aliyê jinan ve tên dayîn. Bi Taybetî jî li dijî gelê Kurd operasyonên leşkerî û zext zêde dibin û mafparêz û femînîst hedef tên girtin.
Lê belê jin ne tenê mexdûrên şerî ne; di heman demê de pêşengên aşitî, azadî û wekheviyê ne. Modela civaka demokratîk a li Rojava, li hemberî pergalên milîtarîst û abaviksalar alternatîfeke bihêz e. ‘’
Ingirit Auner jî li ser navê Platforma Jinan a Roza axivî û bal kişand ser zehmetiyên civakî û aborî yên jinan û ev yek anîn ziman: ‘’ Bi taybetî jî li herêmên şer lê heyî, jin û zarok bedêlên herî giran didin. Zextên li ser jinên Kurd jî bi hedefgirtina têkoşîna azadiya jinan, veguheriye polîtîkayeke şerî ya sîstematîk. Lê belê jin li ber xwe didin. Ji bo cîhaneke wekhev, azad û adil dem dema mezinkirina têkoşînê ye.’’
Axaftinên Razyan û Auer rastîeleqeyeke mezin hatin. Çalakıyê bi axaftinên têkildarî giringiya têkoşîna jinan û peyamên piştevaniyê berdewam kir.
