Kedkarê ragihandina azad Karahan Lokman Ûygûn (Argeş Serhed) sala 2019`an li herêma Metînayê ya Herêmên Parastinê yên Medyayê dema ku bi erk û wezîfeya xwe radibû di êrîşa artêşa Tirk a dagirker de bi giranî birîndar bûbû. Ji bo dermankirinê derbasî Rojavayê Kurdistanê bû û li vê derê dema ku dihate dermankirin 10’ê Tebaxa 2025’an şehîd bû. Şehîd Argeş Serhed li bajarê Qamişlo yê kantona Cizîrê ya Bakur û Rojhilatê Sûriyeyê bi merasimeke girseyî hate oxirkirin.
Gel, saziyên ragihandina azad, endamên Federasyona Gaziyên Bakur û Rojhilatê Sûriyeyê, endamên Saziya Malbatên Şehîdan, saziyên Rêveberiya Xweser a kantona Cizîrê, tev li merasîmê bû. Tabûta cenazeyê şehîd Argeş bi kesk, sor û zer, gulan hat xemilandin. Ji ber keda wî ya di ragihandina azad de kamerayek li ser tabûta wî hat danîn.
Dayîkên Qamişlo bi diruşmên “Şehîd namirin”, “Sond dixwin bi xwîna we ey şehîdên bê mirin”, berz kirin.
Gaziyên şer û xebatkarên ragihandinê tabûta şehîd li ser milan derbasî Pakrewangeha Şehîd Delîl Saroxan kirin. Bi sedan gel, gaziyên şer û xebatkarên ragihandinê li goristanê, karwanê cenazeyê şehîd bi diruşmên “Şehîd namirin” û sembola serkeftinê pêşwazî kirin.
Saziya Malbatên Şehîdan a bajarê Qamişlo merasîm bi rê ve bir. Merasîm bi rêzgirtinê li ser giyanê pakrawanan dest pê kir.
Endamê Saziya Malbatên Şehîdan û bavê şehîd Yilmaz, Şêro Şero axivî. Şero di kesayeta şehîd Argeş de tevahî şehîdên azadiyê bîr anî. Şero wiha domand: “Heta ku gelê Kurd xwediyê van şervanan û şehîdan be dê bi bin nekeve, dê li hemberî şerê taybet ser bikeve.”
Piştre Endamê Rêveberiya Federasyona Gaziyên Bakur û Rojhilatê Sûriyê Laleş Êzîdî axivî.
Laleş Êzîdî di kesayeta şehîd Argeş Serhed de tevahî şehîd bi minetdarî bi bîr anî û got: “Heval Argeş hevalek girêdayî Rêber Apo ma. Soz da şehîdan û li ser wê meşiya.”
“ME BI HEV RE HESTÊN AZADIYÊ PARVE KIRIN”
Laleş Êzîdî wiha domand: “Me bi wî re hestên azadiyê parve kir. HPG`ê gaziyên Bakur û Rojhilatê Sûriyê spas kirin, em jî spasiya wan dikin ku şansê naskirina heval Argeş da me. Em soz didin te heval Argeş em ê gav bi gav li ser fikir û ramanê te bimeşin. Em soz didin ku em ê bi Rêbertiya azad re li ser axa Kurdistanê azad bijîn.”
Şêwirmendê Yekitiya Ragihandina Azad Bunyad Cizîrî, şehîd bi bîr anî û ji malbata şehîd re sersaxî xwest û got: “Heval Argeş zanîngeheke baş xwendibû, dikarî jiyaneke asayî bijî. Lê ji bo gelê xwe, Rêberê xwe asayî jiyan nekir.”
Bunyad Cizîrî behsa ked û têkoşîna şehîd Argeş kir û got: “Em ê jî weke Yekitiya Ragihandina Azad em ê nehêlin pênûsa wî li erdê bimîne û em ê xebata wî bidomînin”.
Endamê Kongra Îslama Demokratîk Umar El Qadirî jî şehîd bîr anî û got: “Em ê li ser soza xwe bin, em ê xwedî li axa xwe derkevin û li ser rêya heqiyê bin”.
Piştre wesîqeya şehadeta şehîd hat xwendin û li ser navê malbatê hevalên wî xebatkarên ragihandinê wesîqeya şehîd girtin.
Dûre girseyê cenazeyê şehîd Argeş Serhed veşart.
ŞEHÎD ARGEŞ SERHED
Argeş Serhed li navçeya Milazgîr a bajarê Mûşê yê Bakurê Kurdistanê ji dayîk dibe. Piştî ku dibistana seretayî, navîn û amedeyî diqedîne, li Zanîngeha Teknîkê ya Rojhilata Navîn (ODTU) ku yek ji zanîngehên sereke yên Tirkiyeyê ye dixwîne. Argeş Serhed li zanîngehê xebatên ciwanên şoreşger û welatparêziyê dimeşand.
RÊYA XALÊ XWE HÎKMET TOKMAK ŞOPAND
Xalê wî Fûat-Hîkmet Tokmak (xebatkar û rêveberê PYD’ê) ku di 29’ê Mijdara 2004’an li Mûsilê di encama komployekê de şehîd bû, bandorek mezin li wî kir. Şehadeta xalê wî têkoşîna wî xurttir kir, zanîngeh di pola sêyemîn de terikand û biryar da ku bibe şoreşger. Li ser vê bingehê di sala 2008’an de berê xwe da çiyayên Kurdistanê û piştî ku tevlî nava karên Komalên Ciwan bû weke şoreşgerekî profesyonel careke din berê xwe da metropolên Tirkiyeyê. Xebatên şoreşgerî da meşandin, ji ber vê gelek caran rastî zextên dewleta Tirk hat.
14’ê Tîrmeha 2010’an di salvegera Berxwedana Rojiya Mirinê ya Mezin de ku rojeke gelekî bi wate û dîrokî ye, li çiyayên Kurdistanê tevlî nava refên gerîla bû. Piştî perwerdeyê bîrdozî û leşkerî li Metînayê xebatên arşîv û çapemeniyê da meşandin. Ji 2010’an heta 2013’an li Metînayê xebatên arşîv û çapemeniyê da meşandin. Di sala 2013’an de beşdarî xebatên Navenda Ragihandin û Çapemeniyê ya HPG’ê bû. Ji 24’ê Tîrmeha 2015’an heta 2017’an li Zagrosan weke nûçegihanê şer kar kir.
Argeş Serhed di sala 2019’an de, li Metînayê dema amedekariya bernameya “Kurmê Darê” dikir, di encama êrişa artêşa Tirk de, ji serê xwe bi giranî birîndar bû. Ji bo tedawiyê derbasî Rojavayê Kurdistanê bû, piştî tedawiyek dijwar a 6 salan, di 10’ê Tebaxa 2025’an de şehîd bû.
