Desteya Serbixwe ya Mafên Mirov a Herêma Kurdistanê got: “Em ji ber êrişa li dijî rojnemavan Hêmin Mamend bi fikarin, em wek hewldanek ji bo sinordarkirina dengên azad û karê rojnamevaniyê dibînin. Pêwîste di zûtirîn dem de êrişkar werin girtin û radestî yasayê bên kirin.”
Desteya Serbixwe ya Mafên Mirov a Herêma Kurdistanê di derbarê êrişa çekdarî ku duh êvarê li Silêmaniyê li dijî rojnamevan Hêmin Mamend pêkhat, daxuyaniyek parve kir.
Di daxuyaniyê de hatiye diyarkirin piştî bûyerê tîmeke wan li nexweşxaneyê serdana Hêmin Mamend kirine û li rewşa wî pirsîne.
Di dewamê de daxwaz ji saziyên ewlehiyê û îdareya parêzgeha Silêmaniyê hatiye kirin ku di zûtirîn dem de êrişkar werin girtin û radestî yasayê werin kirin.
Her wiha hatiye diyarkirin ku ew ji nêz ve vê dosyayê dişopînin û wê li benda lêpirsîna wî bimînin.
Di dirêjiya daxuyaniyê de hatiye gotin: “Em ji ber êrişa li dijî rojnemavan Hêmin Mamend bi fikarin, em wek hewldanek ji bo sinordarkirina dengên azad û karê rojnamevaniyê dibînin.”
Duh êvarî rojnamevan û pêşkêşvanê Stêrk Tv Hêmin Mamend, li Silêmaniyê di encama êrişeke çekdarî de birîndar bû. Di êrişê de du gule li rojnamevan Hêmin Mamend ketin û bi giranî birîndar bû. Rojnamevan Hêmin Mamend niha li nexweşxaneyeke Silêmaniyê tê dermankirin.
