Komeleya Rojnamevanan a Dîcle Firatê (DFG), rapora binpêkirina mafên rojnamevanan a meha Tîrmehê eşkere kir. DFG’ê diyar kir ku li Tirkiyeyê û Bakurê Kurdistanê zextên li ser azadiya çapemeniyê bi gelek rêbazan bi pêş ketine û destnîşan kir ku li ser rojnamevaniya Kurdî jî zext bi rêk û pêk didomin. DFG’ê da zanîn ku di meha Tîrmehê de 12 rojnamevan hatine binçavkirin û rojnamevan Fatma Sîbel Gurcîhan û Cem Kuçuk hatin girtin. Hat ragihandin ku sedemên binçavkirinê nûçe, parvekirinên li ser medyaya dîjîtal û xebatên rojnamevaniyê ye.
DFG’ê di berdewama raporê de diyar kir ku bi operasyonên beriya Civîna NATO’yê di dema şopandina çalakiyê de nehat hiştin ku rojnamevan nûçe çêbikin û hin rojnamevan rastî muameleya xirab hatin.
DFG’ê destnîşan kir ku di meha Tîrmehê de di 14 dosyayan de darizandina 33 rojnamevanan dom kiriye, tevî ku derbarê hin rojnamevanan biryarên beraat û tehliyeyê hatin dayîn jî, gelek doz hatin taloqkirin.
Di raporê de hate diyarkirin ku sansura dîjîtal dewam dike û 20 naverokên medyaya dîjîtal hatin astengkirin û hate destnîşankirin ku xwegihandina 2 nûçe û 2 malperên nûçeyan hatin astengkirin, di vê mehê de ji ber nûçeyan 11 weşan hatin qedexekirin.
Li gorî daneyên DFG’ê niha li Tirkiyeyê 27 rojnamevan hîn jî girtî ne.
DFG’ê di dawiya raporê de ev bang kir: “Rojnamevanî ne sûc e. Mafê şopandin û çêkirina nûçeyan û mafê xwe gihandina agahiyên rast nayê astengkirin. Divê mafê azadiya çapemeniyê bê parastin û mîsogerkirin. Divê rojnamevan ji ber karê xwe neyên astengkirin û neyên darizandin. Divê sansura li ser medya dijîtal bi dawî bibe.”
