Merasîma ji bo Şehîdên Meha Tebaxê bi tevlêbûna endamên sazî û rêxistinên civaka Êzidî û Ereb û malbatên şehîdan li goristana Şehîd Dilgeş û Şehîd Berxwedan a li Çiyayê Şengalê pêk hat.
Piştî deqeyek rêzgirtinê, dayikên şehîdan mûm pêxistin û peyamên girîng hatin dayîn.
Kendal Çiya destpêkê axivî û got: “Bi keda hevalên me yên ku canê xwe feda kirin, me karî dawî li fermanê bînin. Rêber Apo jî ev yek anî ziman ku êdî divê civaka Êzidî di mijara fermanê de xalekê deyne û ew serdem ji bo civakê bi dawî bibe. Îro em bi hejmareke mezin li vî cihî pîroz kom bûne û ev yek bi saya şehîdan e. Ji bo ku em îro karibin bi azadî li vir kom bibin, hevalên me canê feda kirin.”
Kendal Çiya di berdewamiyê de got, meha Tebaxê meha vejînê ye û tekezî li ser vê kir: “Giring e ku em fêm bikin çima dijmin dixwaze vê meha vejînê ji bo civaka Kurd, bi taybetî ji bo civaka Êzidî bike meha qirkirin û tinekirinê. Ji bo ku em vê fêm bikin, divê em bîra xwe ya dîrokî nû bikin. Dijmin di 15’ê Tebaxê de li Dersimê Atakan Mahîr û di heman dîrokê de li Şengalê Mam Zekî kirin hedef. Atakan Mahîr jî yek ji pêşengên civaka me ya Elewî bû ku ew jî mîna me di qirkirinan de derbas bûbûn.
Em wek civaka Êzidî, êdî ne wek berê ne. Me zanîna xwe pêş xistiye, me dît çi bi serê me hatiye û li gorî wê, êdî tedbîrên xwe digirin û xwe diparêzin. Loma îro li Siwêydayê, Durzî rastî heqareta herî mezin tên, civaka Elewî dorpêçkirî ye. Dema em wan dibînin, fermana 2014’an tê bîra me. Lê ji bo me rewş cuda ye. Em xwedî hêz û rêxistinê ne û li dijî hemû êrîşên ku bi kemînan tên kirin, derdikevin.”
Kendal Çiya wiha domand: “Em wekî rêxistina li Şengalê, tevî hêzên xwe yên parastinê, soza ku me daye civaka xwe pêk tînin. Em li ser wê sozê ne, ji ber ku em xwedî wê hêzê ne ku em xwedî li soza xwe û şehîdên xwe derkevin.”
Di dawiyê de Kendal Çiya îşaret bi “Pêngava Aştî û Civaka Demokratîk” a ku Rêber Apo daye destpêkirin kir û got: “Em ji serê Çiyayê Şengalê ji goristana şehîdan, rêz û hezkirinên xwe ji bo Rêber Apo dişînin. Her gavek ku Rêber Apo biavêje, em wekî civaka Êzidî bi hemû hêza xwe piştgiriyê didinê.”
Piştî axaftina Kendal Çiya, li ser navê civaka Ereb a Şengalê, Berpirsê Meclisên gundewarên Ereban Xelîl Ereb jî peyama xwe da û destnîşan kir ku hedef û armanca şehîdên me, bi taybetî Mam Zekî û Saîd Hesen ew bû ku yekîtiyê di nava pêkhateyên Şengalê de çêbikin. Lewma ji me tê xwestin ku em hemû bi hev re xwedî li keda wan derkevin û li ser wî esasî têkoşînê xurt bikin.
Piştî axaftinan, sînevîzyonek li ser şehîdên meha Tebaxê hate pêşandan û bi dirûşmeyên “Şehîd namirin” gel ber bi ser gorên şehîdan ve çûn. Li ser hemû gorên şehîdan mûm hatin pêxistin û merasîm bi dawî bû.
