Ji 10’ê Nîsana 2025’an ve ji aliyê hikûmeta Iraqê ve li ser Wargeha Penaberan a Şehîd Rûstem Cûdî (Mexmûr) amabargoyek pir alî tê meşandin. Hikûmeta Iraqê bi ti awayî nahêle ne kel û pelên avahîsazî, ne derman û ne jî pêdivên perwerdeyê bikeve nava wargehê. Her wiha gelek pêwîstiyên jiyanî yên din jî li gorî tê xwestin nahêlin bikeve wargehê. Di nava vê ambargoyê de gelek pirsgirêkên wargehê hatin jiyîn û hîn jî tên jiyîn. Yek ji van pirsgirêkan jî rê nedayîna xelkê wargehê ya ji bo bajarên Iraqê ye, ev jî bi hinceta ku nasnameyên wan bi ser de derbaz bûye. Li ser vê yekê gelek caran hemwelatiyên wargehê ji aliyê Iraqê ve hatiye girtin û bi rojan di bin çavan de mane. Bi taybet di Gulana îsal de ji bo ev pirsgirêkên wargehê bên çareserkirin, şandeyek ji rêveberên wargehê pêkdihat serdana Bexdayê kirin, lê di vegerê de ji aliyê Iraqê ve hatin girtin û bi qasî 37 rojan girtî man. Herî dawî beriya çend rojane dîsa Hevserokê Meclîsa Gel a Memxûrê Ehmed Şehbaz û ajokarê bi navê Gabar Nas ji aliyê Iraqê ve hatin girtin.
Hevseroka Dîwana Meclîsa Gel a Wargeha Penaberan ya Şehîd Rûstem Cûdî Nûdem Yaman têkildarî vê ambargoyê û girtina Hevserokê Meclîsa Gel Ehmed Şehbaz, Gabar Nas û girtiyên din axivî. Nûdem Yaman diyar kir ku ev demek dirêje ambarogoyek ji aliyê hikûmeta Iraqê ve li ser Wargeha Penaberan a Şehîd Rûstem Cûdî tê meşandin û wiha axivî: “Ev ambargo hîn jî berdewam e. Di vê ambargoyê de gelek pirsgirêk hatin jiyîn û hîn jî tê jiyîn. Yek ji wan pirsgirêkên sereke ku em balê bikişînin ser, girtinên hemwelatiyên vê wargehê ne. Bi rojane hemwelatî bi hinceta ku nasnameyên we bi ser de derbaz bûne tên girtin. Bêguman di nava wan de hevserokên wargehê jî têne girtin. Ev cara duyemîne ku hikûmeta Iraqê Hevserokê me Ehmed Şehbaz digirin. Ev 5 roj in dîsa hikûmeta Iraqê Ehmed Şehbaz û ajokarê bi anavê Gabar Nas binçav kirine, wek wargeh em bi zelalî nizanin bê ji ber kîjan sedeman hatine girtin. Hincetên ku nasnameyên we sere derbaz bûye. Bêguman ev pirsgirêkên nasnameyê ku 2-3 sal in em wek wargeh dijîn, ne ji aliyê me ve rûdaye. Çareserkirina vê pirsgirêkê dewleta Iraqê ye, lê weke ku ev pirsgirêk a me be li ser vê yekê girtinên hemwelatiyên vê wargehê çêdibin.”
‘TENGASIYEK PIR CÎDÎ LI SER WARGEHÊ HEYE’
Nûdem Yaman îşaret bi girtina komek ciwanê ku li ser kar hatibûn girtin kir û wiha pê de çû: “Beriya çend rojan dîsa çend ciwan li ser kar hatibûn girtin. Her wiha beriya du mehan dîsa Hevserokê Meclîsa Wargehê li gel Hevşaredar û yên dîplomasiyê hatibûn girtin. Her carê bi hincetên cûda, bi taybet girtina nûneran, girtina îrdeya vê wargehê tê wateya nasnekirina îradeya vê wargehê. Kesên ku diçin nexweşxanê bi taybet Hevserokê Meclîsa Gel Ehmed Şehbaz ku dema vedigeriya hatiye girtin, ev tê wê wateyê ku nexweşên me yên ku diçin û tên ji bo wan jî pirsgirêkan çêbike. Tengasiyek pir cidî li ser wargehê heye. Hatina kel û pelên ku tên wargehê de dibe pirsgirêk, hatina kesekî ku ji derve de tê wargehê wek hemwelatiyekî Iraqê be yan ji derve de be, pirsgirêkan çêdikin.”
‘XELKÊ WARGEHÊ ÎRADEYA XWE ESAS DIGRE’
Nûdem Yaman bal kişand li ser pêvajoya Rêber Apo daye destpêkirin û wiha domand: “Di pêvajoya ku ewqas qala aşîtiyê têde tê kirin de, ku tevahî jiyana gelê Kurd têde îfade dike girtina hevserok û hemwelatiyên vê wargehê û ambargoya ku tê meşandin mirov nizane çawan bi nav bike. Eger di asta hevserokatiyê de girtin çêbibe, ev yek metirsiyê li ser tevahî hemwelatiyên wargehê jî dide çêkirin. Dixwazin di vê pêvajoya ewqas girîng de tengasiyên wisa ji bo wargehê çêbikin ku wargeh bidin belav kirin û bê armac bihêlin. Lê cîhan giştî jî dizanin ev wargeh 30 sal in li ser îradeyekê, li ser xet û bîrdoziyekê ya herî girîng li ser armancekî diyarker hatiye vêderê. Li tevî hemû zorî, zehmetî, komkujî û hwd, xelkê wargehê îradeya xwe esas girtiye û vîna xwe teslîmî ti dewletan ne kirine. Me wek wargeh ti carî qebûlnekiriye ku em îradeya xwe teslîmî dewleta Tirkiye bikin û em ji bo dewleta Iraqê jî vê qebûl nakin. Dibe ku girtin, kuştin, derî girtin çêbibe, lê wekî wargeh armanca ku me daniye pêşiya xwe em jê navegerin, bila ev yek baş were zanîn.”
‘DIVÊ HEVSEROKÊ ME DEMILDEST BÊ BERDAN’
Hevseroka Dîwana Meclîsa Gel Nûdem Yaman xwest Hevserokê Meclîsa Wargeha Penaberan a Şehîd Rûstem Cûdî were berdan û bi van gotinan dawî li axaftina xwe anî: “Em bang li kesên ku mafên mirovan, mafê penaberan diparêzin, bi taybet li NY’ê dikin ku xwedî li vê wargehê derbikevin. Ji ber ku em weke wargeh di bin sîwana NY’ê de ne, divê berpirsyartiyên xwe bicih bînin. Her wiha divê Iraq demildest dest ji van kiryarên xwe yên li ser wargehê berde û Hevserokê me ku rewşa nexweşiya wî nediyare ku divê demildest bê berdan.”
