Buroya Hiqûqê ya Sedsalê ku parêzeriyê ji Rêber Apo re dike, têkildarî berevajîkirina rastiya hevpeyvîna ku doh hate weşandin, daxuyaniyek da.
Buroya Hiqûqê ya Sedsalê diyar kir ku rexneyên Rêber Apo li hemberî Partiya Demokrasî û Wekheviyê ya Gelan (DEM Partî) nîne û got, “Em dibînin ku hevpeyvînek bi navê buroya me hatiye kirin ji aliyê hin qadên çapemeniyê û hesabên medya dîjîtal hatiye berevajîkirin û bi vî rengî hatiye weşandin. Gotinên ku dibêje mebesta Birêz Ocalan ji qada siyasî DEM Partî ye û rexneyên xwe jî di vê çarçoveyê de ne, rast nîne.
Bêguman hemû beş dikarin bibin mijara rexneyên Birêz Ocalan. Lê belê di hevpeyvîna navborî de berevajî gotinên hatine berevajîkirin Birêz Ocalan destnîşan dike ku di qonaxa çareseriya pirsgirêka 100 salî de saziya siyasetê bi giştî cidiyeta pêwîst nîşan nade. Rexneyê li siyasetê dike ku li şûna çareserkirina pirsgirêkê vediguhere şerê berjewendiyê. Ev gotin ji bo tevahiya siyaseta Tirkiyeyê ye, berevajî îdîayan têkildarî DEM Partiyê nîne. Eşkere ye ku berevajîkirina beşa pêwendîdar a roportajê xizmetê ji pêvajoyê, aştiyê û avakirina civaka demokratîk re nake. Em li bendê ne ku her beş bi vê hesasiyet û cidiyetê tevbigere.”
