Dokûmanter wê bi beşa ‘Rojên Rojhilata Navîn’ re ku vê hefteyê bê weşandin, pêvajoya PKK’ê ya li kampên Fîlîstînê, Berxwedana Keleha Arnonê ya destsanî ya li Lubnanê û çîroka vê berxwedanê ya heta bi Kongreya 2’emîn a PKK’ê vebêje.
Berxwedana Keleha Arnonê hem ji bo tevgera Kurd hem jî ya Fîlîstînê, bû sembola ‘ruhê berxwedaneke bê sînor’.
Vejîna Kurd di beşa ‘Dilê Rojhilata Navîn’ de Berxwedana Arnonê û pêvajoya Kongreya 2’yemîn a PKK’ê digihîne hev û balê dikişîne ser serdemeke girîng.
Keleha Arnonê û Kongreya 2’yemîn a PKK’ê ya Tebaxa 1982’an serdemên krîtîk e ku hem piştevaniya enternasyonal a tevgera Kurd, hem jî pêvajoya plankirina têkoşînê li xaka xwe ya tevgera azadiyê vedibêje.
NÎŞANEYA FEDAKARIYÊ: KELEHA ARNONÊ
Keleha Arnonê ku kelek di dilê Rojhilata Navîn de ye, bû nîşaneya lehengî û fedakariyê. Keleha Arnonê ku li başûrê Lubnanê ye, di sala 1982’an de li hemberî dagirkeriya Îsraîlê bû yek ji çeperên sembolîk ên berxwedanê. Komên Fîlîstînî li vê derê demeke dirêj li hemberî artêşa Îsraîlê li ber xwe dan. Hin ji kadroyên tevgera Kurd jî di van çeperan de li gel Fîlîstîniyan şer kirin. Keleha Arnonê ne tenê çepereke leşkerî bû, di heman demê de weke ‘Keleha Piştevaiya Gelan’ dihate dîtin.
Ji bo PKK’ê ev yek tecrûbeyeke girîng bû ku navneteweyîbûna têkoşîna azadiyê ya Kurd û têkiliya xwişk û biratiyê ya bi gelê Fîlîstînê re nîşan dida.
Di 6’ê Hezîrana 1982’an de piştî bi dagirkeriya Îsraîlê ya li Lubnanê re PKK’yiyan li gel şervanên Fîlîstînî Keleya Arnon (Arnoun) parastin. Li hemberî bombardûman û dorpêça bi rojan çeper neterikandin. Di şer de 11 PKK’yî şehîd bûn, nêzî 15 kadro jî dîl hatin girtin.
HABAŞ: ME KENGÎ WEKE PKK’YIYAN LI BER XWE DAN, WÊ DEMÊ EM Ê FÎLÎSTÎNÊ AZAD BIKIN
Şoreşgerên Fîlîstînî yên wê demê kadroyên PKK’ê yên şehîd bûn weke ‘Lehengên Arnonê’ û ‘Şêrên Beyrûdê’ pênase kirin û bi bîr anîn. Piştî vê berxwedana dîrokî damezrînerê Eniya Rizgaryia Gel a Fîlîstînê George Habaş bi vê gotinê qala PKK’iyan kir, “Me kengî weke hevalên PKK’yî li ber xwe dan, em ê hingî Fîlîstînê azad bikin.”
JI ARNONÊ BER BI KURDISTANÊ VE
Berxwedan û şehadetên li Arnonê di heman demê de wê ruhê Kongreya 2’yemîn a PKK’ê diyar bikira ku di 20-25’ê Tebaxa heman salê de wê bihata lidarxistin. Bi kongreya 2’yemîn re ku weke xaleke werçerxê ya dîroka PKK’ê derbasî nava rûpelên dîrokê bû, têkoşîna azadiyê ya Kurd berê xwe da welêt.
Bi kurtasî Rojên Rojhilata Navîn ji bo fêhmkirina kodên genetîk ên tevgera azadiyê ya Kurd girîng e.
Di vê beşa dokûmanterê de ji berxwedêrên Keleha Arnonê ya dîrokî Cemîl Bayik, Dûran Kalkan, Sakîne Karakoçan û Sabrî Ok qala şahidiya xwe dikin.
Her wiha dîmenên qet nehatine weşandin ên Kongreya 2’yemîn a PKK’ê wê yekemcar bêne weşandin.
Kurdiya Beşa Rojên Rojhilata Navîn a dokûmanterê wê 24’ê Îlonê êvara Çarşemê li Stêrk TV bê weşandin.
Versiyona wê ya Tirkî jî wê 26’ê Îlonê êvara Înê bi dema Ewropayê saet di 19:00, bi dema Amedê jî saet di 20:00 de li Medya Haber TV bê weşandin.
Beşên dokûmanterê yên heta niha hatine weşandin li ser van navnîşanên înternetê dikarin bêne temaşekirin:
https://t.me/taradokumanter
