Serokê Odeyên Esnaf û Sanatkaran a Amedê Alîcan Ebedînoglû diyar kir ku di navbera herêman de neheqiyeke cidî ya aboriyê heye û destnîşan kir ku ev hevsengiya têkçûyî divê bê çareserkirin.
Krîzên pir alî yên ji aliyê desthilatdariya AKP’ê ve hatine afirandin bandorê li her qada jiyanê dikin. Buhayê ku her roj tê zêdekirin derfetê gel ê aboriyê kêm dike, xizaniyê mezin dike. Krîz bandoreke giran li esnafan jî dike. Serokê Yekîtiya Odeyên Esnaf û Sanatkaran a Amedê Alîcan Ebedînoglû ji ANF’ê re axivî û got, “Weke ku tê zanîn li herêma me kar û aborî herî zêde pişta xwe dispêre esnaf û sanatkaran. di pêvajoya şer de ya zêdeyî 40 salan dewam kir, yên ku li herêma me kete bin bar dîsa esnaf û sanatkar bûn. Ji vê herêmê neçûn, derfetên kar afirandin, hewl dan kargehên xwe vekirî bihêlin. Bi rastî jî weke esnaf me 10 salên derbasbûyî gelek zor û zehmetî dît. Darbe, pandemî û piştre jî pêvajoya erdhejê weke ku bandor li her beşên civakê yên li Tirkiyeyê kir, bandoreke mezin li esnaf û sanatkarên me jî kir. Ev bandor bi taybetî bi krîza aborî re hîn dewam dike. Di vê pêvajoyê de gelek kargeh neçar man bêne girtin.”
HÊVIYA AŞTIYÊ JI NÛ VE ŞÎN BÛ
Ebedînoglû destnîşan kir ku eger pêvajoya aştiyê bi rengekî erênî bi pêş ve biçe wê derfetên aboriyê biafirin û got, “Çareseriya pirsgirêkên aboriyê bi aştiyê dibe. Têkildarî avakirina aştî, xwişk û biratiyê hêviyên me sala dawî bi gavên hatin avêtin re ji nû ve şîn bûn. Yekane fikara me û gelê me ew e ku kaosa li pêvajoya 2013’an di vê pêvajoyê de jî nû nebe. Ji bo ev yek nebe divê em, her kes, her beş xwedî li vê pêvajoyê derkeve. Ez bi xwe spasiya hemû partiyên siyasî û aliyan dikim ku bi gava hatiye avêtin re hêviya aştiyê ji nû ve şîn kirine. Gava hate avêtin bi rastî jî ji bo herdu aliyan bi wêrekî û gaveke mezin bû. Divê esnaf, bazirgan, gel û her beşên civakê xwedî li vê gavê derkevin. Naxwe em nema dikarin ji binê vê êşê rabin, welatiyên me, gelê me nikarin ji binê vê êşê rabin. Belê, ji bo pirsggirêka Kurd divê sererastkirinên destûra bingehîn ên esasî bêne kirin. Têkildarî ziman û çanda xwe bêguman em ê mafên xwe bixwazin. Gavên di vê mijarê de divê bêne avêtin, divê bi lez bêne avêtin. Li cihê ku aramî û ewlehî nebe hûn nikarin li ser aboriyê biaxivin. Di vê pêvajoyê de karê me yê sereke atmosfereke ewlehî û aramiyê ye.”
