Meclisa Malbatên Şehîdan a Helebê ji bo şervana YPJ’ê Çiya Hozan (Newroz Cafer) ku 16’ê Çileya 2025’an di berxwedana Bendava Tişrînê ya li hemberî êrişên dewleta Tirk û çeteyên wê de şehîd bûbû, merasîma xiyabî li dar xist.
Merasîm li Qada Şehîdan a Şêxmeqsûdê bi beşdariya girseyeke mezin a şêniyan pêk hat.
Piştî deqeya rêzgirtinê bi navê Meclisa Malbatên Şehîdan hevseroka Meclisa Giştî ya Şêxmeqsûd û Eşrefiyê Hêvîn Silêman, bi navê Hêzên Ewlekariya Hundirîn ji rêveberên hêzê Heyfa Qert Elî, bi navê Saziya Olî ji rêveberên saziyê Nesrîn Îbrahîm û bi navê malbata şehîd Çiya, birayê wê Xebat Cafer axivîn.
Hêvîn Silêman di axaftina xwe de şehîdên azadiyê bi bîr anîn û bal kişand ser berxwedana ku gel di şoreşa 19’ê Tîrmehê de daye û destkeftiyên ku parastine.
Hêvîn bi bîr xistin ku îro salvegera rizgarkirina Reqayê ji çeteyên DAIŞ’ê ye û got, Reqa bi berdêlên giran ku li şûna tevahiya cîhanê hatin dayîn, hatin rizgarkirin.
Hêvîn Silêman îşaret pêk kir ku şehîd Çiya rêgezên berxwedana şerê gel şoreşgerî di fikirê xwe de parastin û got: “Şehîd Çiya di qadên şer û jiyana hevrêtiyê de mînak bû. Li hemberî hemû zehmetiyan disekinî û bi israr û berxwedanê serkeftin diafirand. “
Nesrîn Îbrahîm jî anî ziman ku cihê şehîdan li cem Xweda û di nava civakê de taybet e û got: “Şehîd ji bo parastina welat û hildana ala heqiyê canê xwe feda dikin.”
Nesrînê banga xwedîderketina li nirxên şehîdan kir.
Birayê şehîd Çiya, Xebat Cafer jî anî ziman ku ew bi şehadeta xwişka xwe serbilind in ku li hemberî dagirkeriyê têkoşîn kir. Her wiha anî ziman ku ew ê heya serkeftinê û pêkanîna armancên şehîdan ên avakirina welatekî azad û demokratîk tê bikoşin.
Xwişka şehîd Çiya Hozan, Meryem Cafer nasnameya şehîd xwend. Di dawiyê de sersaxî da malbata şehîd.
