Hevserokê Giştî yê Partiya Herêmên Demokratîk (DBP) Keskîn Bayindir li navçeya Bodrûmê ya Mûglayê di hevdîtina gel de bi welatiyan re civiya. Hevberdevkên DBP’ê yên Ege û Îzmîrê, endamên Koordînasyona Jinan a Navendî ya Partiya Wekhevî û Demokrasiyê ya Gelan (DEM Partî), hevserokên bajaran ên Îzmîr, Aydin û Mûglayê û rêveberên DEM Partiyê yên navçeyên Mûglayê ligel Bayindir bûn. Di civîna li Navenda Çalakiyan a Musgebi ya Bodrûmê de pankarta bi nivîsa “Civînên Aştî û Civaka Demokratîk” li holê hat daliqandin. Gelek welatî beşdarî hevdîtinê bûn.
Keskîn Bayindir destnîşan kir ku partiyên muxalefetê bi berjewendiyî nêzî pirsgirêka Kurd dibin ku bingeha hemû pirsgirêkan e û çavkaniyên welêt qedandine û di nava şandeya ku çû Îmraliyê de cih negirtine. Bayindir bilêv kir ku nêzîkatiyeke ev qasî nêzîk li meseleya bingehîn a welêt gelê Kurd êşandiye û got ku ya ku dikeve ser milê wan ew e ku heya dawiyê deriyê aştiyê vekin û gel bigihînin aştî û demokrasiyê.
Bayindir bilêv kir ku di serî de partiyên muxalefetê û bi giştî her kes ji bo di têkoşîna aştiyê de wekî kirdeyeke çalak cih bigirin dê heya dawiyê têbikoşin. Bayindir destnîşan kir ku di serî partiyên muxalefetê divê hemû welatî ji bo bilindkirina dengê aştiyê hewl bidin û got ku hêza wan a ku bi desthilatê gav bidin avêtin heye.
Bayindir anî ziman ku pêvajoya heyî ji bo her kesî dîrokî ye û got ku divê di serî de gelê Kurd û dostên wan, divê 85 milyon bi yekdengî aştî, wekhevî û edaletê biqîre.
