Li Hesekê û Zirganê ji bo şermezarkirina biryara Wezareta Perwerdeyê ya hikûmeta veguhêz a Sûriyeyê ya girêdayî mijara zimanê Kurdî li dibistanan û dayîna tenê 3 dersan di hefteyekê de, çalakî hatin lidarxistin.
HESEKÊ
Li Hesekê, Peymangeha Amadekirina Mamosteyan bi beşdariya bi dehan mamosteyan, çalakiyeke hunerî organîze kir. Beşdarên çalakiyê pankartên “Zimanê kurdî nasnameya me ye”, “Zimanê kurdî dîrok e” û “Bê ziman jiyan nabe” rakirin.
Çalakiyê bi deqeyeke rêzgirtinê dest pê kir, paşê komên hunerî yên girêdayî Peymangeha Amadekariyên Mamosteyan stranên Kurdî pêşkêş kirin.
Çalakî bi berzkirina dirûşmeyên girêdayî girîngiya zimanê Kurdî bi dawî bû.
ZIRGAN
Li bajarê Zirganê jî bi sedan şênî daketin qadan û meşek lidarxist. Meş ji pêşiya Firina Jinan bi rakirina pankartên “Zimanê me nasnameya me ye”, “Ez ji bilî zimanê Kurdî tu zimanên din naxwazim” û “Perwerdeya bi zimanê Kurdî mafekî rewa ye” dest pê kir.
Piştî ku meşvan gihîştin Çerxerêya Şehîd Dijwar, meşa xwe veguherand mîtîngê. Di mîtîngê de piştî deqeya rêzgirtinê endama Rêveberiya Dibistanan a Zirganê Ruha Hac Elî axivî û da zanîn ku perwerdeya bi zimanê dayikê mafekî rewa ye.
Ruha Hac Elî, daxwaz ji Wezareta Perwerdeyê kir ku biryara girêdayî zimanê Kurdî rast bike. Ruha Hac Elî, destnîşan kir ku dayîna 3 dersan di hefteyekê de têrê nake, wê demê xwendekar nikarin xwendina xwe ya qonaxên navîn û amadehî bi zimanê xwe yê dayikê bidomînin.
Ruha Hac Elî, da zanîn ku zimanê Kurdî ne tenê şêwaya dan û stendina rojane ye, ew faktoreke esasî ya nasnameya dîrokî ya şaristaniyên li Rojhilata Navîn e.
Meş bi berzkirina dirûşmeyên şermezarkirina înkara zimanê Kurdî bi dawî bû.
