Endamên Şandeya Îmraliyê ya Partiya Wekhevî û Demokrasiyê ya Gelan (DEM Parti) Pervîn Buldan, Mîthat Sancar û parêzerê Buroya Hiqûqê ya Sedsalê Faik Ozgur Erol, li Navenda Giştî ya Partiya Kedê (EMEP) bi şandeya EMEP’ê re civiyan. Piştî hevdîtinê daxuyaniyeke hevpar a çapemeniyê hate dayîn.
EMEP: ÊRÎŞA LI SER LEYLA ZANA KIRÊT E
Serokê Giştî yê EMEP’ê Seyit Aslan ku di daxuyaniya çapemeniyê de ewil axivî, êrîşa li ser siyasetmedar Leyla Zana wekî “kirêt û nîjadperest” pênase kir. Aslan destnîşan kir ku di serdemeke ku pêvajoyeke nû tê nîqaşkirin de êrîşên bi vî rengî nayên qebûlkirin û diyar kir ku ew li gel Leyla Zana ne.
Aslan bal kişand ser nîqaşên derbarê pêvajoyê de jî û diyar kir ku raporên hatine eşkere kirin di warê nîşandana daxwazên gelê Kurd de kêm mane û got ku EMEP’ê rapora xwe bi raya giştî re parve kiriye.
BAL KIŞAND SER MAFÊN WEKHEV Û GARANTIYA YASAYÎ
Aslan da zanîn ku pirsgirêka Kurd pirsgirêkek dîrokî ya 100 salî ye û wiha got: “Ji bo ji holê rakirina şer û neyîniyên ku diqewimin, em wek partî duh jî, îro jî û sibê jî çi ji destê me bê em ê bikin. Ji bo ku ev pêvajo bi aştiyê bi encam bibe û li ser bingeha mafên wekhev bi dawî bibe, em ê xebat û ramanên xwe bi raya giştî re parve bikin. Di hevdîtina îro de derfeta me çêbû ku em hem ramanên xwe hem jî ramanên şandeya mêvan hîn bibin. Di dema pêş de, em ê hewldanên ji bo garantiya vê pêvajoyê bi qanûnan bişopînin. Helbet em ê daxwaz bikin ku gavên ji bo aştiyeke rasteqîn bên avêtin. Di nav de sepandina biryarên DMME’yê jî di nav de, vegera şaredaran ser karê xwe û rakirina astengiyên li pêşiya maf û azadiyên demokratîk, em ê têkoşîna xwe bi hev re bidomînin.”
BULDAN: EM DI SERDEMA HERÎ NÊZÎ AŞTIYÊ DE NE
Endama Şandeya Îmraliyê ya DEM Partiyê Pervîn Buldan jî diyar kir ku ew di pêvajoyeke krîtîk de ne û pêdiviya wan bi piştgiriya hemû partiyên siyasî heye. Buldan anî ziman ku nêzî hefteyekê ye ew serdana partiyên siyasî dikin û destnîşan kir ku ew di yek ji serdemên herî nêzî aştiyê de ne.
Buldan diyar kir ku divê ji bo aştiyeke birûmet her kes berpirsiyariyê bigire ser xwe û wiha axivî: “Êdî divê ne tenê dest, lê bedena mirov di bin kevir de be. Di vê mijarê de me di qonaxên gihîştî de her cure piştgiriya MHP’ê dît. Me her tim dît ku heta hûn li gel me bisekinin daxuyaniyên wan piştgirî didin. Di civîna ku me niha pêk anî de jî, li ser berdewamiya vê yekê lihevkirinek heye.”
‘EV MESELE 86 MÎLYONÎ ELEQEDAR DIKE’
Pervîn Buldan destnîşan kir ku pirsgirêka Kurd û demokratîkbûn ne tenê meseleya DEM Partiyê yan jî Kurdan e, ev meseleya 86 mîlyon mirovî ye, lewma pêdivî bi keda her kesî heye. Buldan ragihand ku ew ê sibê bi Wezîrê Dadê û Serokê Parlamenê Numan Kurtulmuş re bicivin û piştgiriya partiyên siyasî bigirin, piştre jî plan dikin ku bi Serokkomar re jî hevdîtinekê pêk bînin.
Buldan bi bîr xist ku derbasî qonaxa duyemîn bûne û got: “Qonaxa ku em gihîştinê qonaxa duyemîn e û di vê qonaxê de pêdivî bi rêziknameyeke zagonî heye, hûn jî dizanin. Niha em li ser vê şêwir dikin. Dê çi celeb zagon derkeve, dê kîjan aliyan li xwe bigire? Lewma di vê mijarê de, di hevdîtina ku me pêk anî de, em helbet raman û nêrînên girîng ên desthilatdariyê jî hîn bûn. Lê di encamê de, ez dixwazim careke din binê vê xêz bikim ku divê ev zagon bêyî windakirina demê bi lez derkeve.”
SANCAR: GARANTIYA HIQÛQÊ TÊKOŞÎNA SIYASÎ YE
Mîthat Sancar jî diyar kir ku aştî hewcedarê hiqûqê ye û destnîşan kir ku misogerkirina dawî ya hiqûqê, têkoşîna siyasî û xwedîderketina civaka demokratîk e. Sancar anî ziman ku ji bo qaîde ne tenê li ser kaxezê bimînin, yekîtiyên demokratîk ên berfireh û piştgiriya civakî ya xurt şert in. Sancar bal kişand ser têkoşîna hevpar a di vê rêyê de.
Sancar got ku EMEP amade ye keda xwe bide pêvajoyê û ji niha û pê de jî vîna meşîna bi hev re ya di çarçoveyeke hevpar de hatiye anîn ziman.
