Nobedarên Edaletê yên ji bo azadiya fîzîkî ya Rêberê Gelê Kurd Abdullah Ocalan û ji pirsgirêka Kurd re çareseriya demokratîk li gelek bajaran hatine destpêkirin,didomin.
WAN
Nobeta Edaletê ya ku bi pêşengiya TUHAY-DER’ê li Wanê hatiye destpêkirin di roja xwe ya 52’yemîn de didome. Çalakiya nobetê ya li avahiya Rêxistina Partiya Herêmên Demokratîk (DBP) didome, ji aliyê Hevserokê Giştî yê DBP’ê Keskîn Bayindir, Tevgera Jinên Azad (TJA), Meclîsa Dayikên Aştiyê, parlamenterên DEM Partiyê yên herêma Serhadê, endamên meclîsa partiyê, rêveberên navçeya Gewaşê û gelek kesan ve hat ziyaretkirin.
Hevserokê Giştî yp DBP’ê Keskîn Bayindiraxaftinek kir û got, “Em spasdarê we ne. Hûn 10 sal in li dijî vê zilm û zordariyê têdikoşin. Em ê bi qasî hêza xwe li cem dayikên xwe bin. Em ê têkoşîna ji bo azadiya Birêz Abdullah Ocalan tenê ji girtiyên siyasî re nehêlin. Berpirsyariyeke dîrokî û mezin dikeve ser milê me û em soz didin ku em ê vî barî hilgirin ser milê xwe. Heta ku Birêz Ocalan azad bibe em ê vê têkoşînê mezin bikin. Heta ku ji pirsgirêka kurd re çareserî bê dîtin em ê têkoşîna xwe mezin bikin û berfireh bikin. Em 10 sal in li hemberî vê zilmê bi îradeyeke xurt li ber xwe didin û bi hêza vê îradeyê em ê azadiya Birêz Ocalan misoger bikin û pirsgirêka Kurd çareser bikin. Em weke siyasetmedar çi erk dikeve ser milê me amade ne ku pêk bînin.”.
Çalakiya nobetê bi dirûşma “Bijî berxwedana zindanan” berdewam kir.
MÊRSÎN
Nobeta Edaletê ya ku ji aliyê Komeleya Alîkariya bi Girtî û Malbatên Hikumxwaran a Çukurovayê (Çukurova TUAY-DER) ve li avahiya komeleyê ya Mêrsînê hatiye destpêkirin, di roja 53’yemîn de didome. Di çalakiya nobetê de ku parlamentera Partiya Wekhevî û Demokrasiyê ya Gelan (DEM Partî) Newroz Uysal, namzetên Hevşaredariya Akdenîzê yên DEM Partiyê Hoşyar Sariyildiz û Nûriye Arslan, endamên Meclîsa Dayikên Aştiyê û rêveberên DEM Partiyê amade bûn û bênavber dirûşm berz kirin.
Endama Meclisa Dayikên Aştiyê Emîne Eren di Nobeta Edaletê de axivî û got, “Heta ku ev tecrîda fîzîkî li ser Rêberê me rabe em ê vê nobetê bidomînin. Bi baweriya min ger bi Rêberê me re hevdîtin bê kirin wê aştî were Tirkiyeyê û ev şer wê bi temamî raweste.”
Parlamentera DEM Partiyê Newroz Uysal rojiyên mirinê yên li girtîgeha Amedê hatibû destpêkirin bi bîr xist û got, “Girtî baş dizanin ku ev rewş ne hiqûqî ye. Nêzîkatiya çareseriya pirsgirêka Kurd ev e. Nêzîkatiya li Îmraliyê jî nêzîkatiya çareseriya pirsgirêka Kurd e. Bi israr û zelal azadiya Birêz Ocalan tê xwestin.”
Çalakvanên nobetê piştre beşdarî ‘Panela Azadiya Jinê’ ya ku li Salona Dawetê ya Şah tê lidarxistin bûn.
Li Edeneyê jinên ku 53 roj in di bin pêşengiya Komeleya Alîkarî û Piştevaniya Malbatên Girtî û Hikûmxwaran a Akdenîz Edeneyê (AATUHAY-DER) de Nobeta Edaletê li dar dixin, bi tevlîbûna “Panela Azadiya Jinê” ya li Mêrsînê pêk hat, çalakiya xwe berdewam kirin.
MÊRDÎN
Gelek kes çûn serdana Nobeta Edaletê ya ku xizmên girtiyan û Dayikên Aştiyê yên li avahiya DBP’ê ya Mêrdînê tê lidarxistin. Di çalakiyê de stran hatin gotin, Dayika Aştiyê Şukriye Çetîn diyar kir ku dixwazin bi Abdullah Ocalan re hemû girtî ji girtîgehê derkevin.
AMED
Nobeta Edaletê ya ku bi pêşengiya Komeleya Alîkariya bi Malbatên Girtiyan re (TUAY-DER) li avahiya DEM Partiyê ya navçeya Rezan a Amedê hat destpêkirin, di roja 52’yan de didome. Kesên tev li nobetê bûn berdilkên bi nivîsa bi Kurdî û Tirkî “Tecrîd sûcê mirovahiyê ye” li xwe kirin. Rêveberên navçeya Hezro ya DEM Partiyê û namzetên Hevşaredarên Hezroyê Hasîbe Yazdîk, Erhan Guven û xizmên girtiyan beşdarî nobetê bûn. Beşdaran di nobetê de stran û helbestên berxwedanê xwendin.
STENBOL
Çalakiya Nobeta Edaletê ya ji aliyê xizmên girtiyan ve bi pêşengiya Komeleya Alîkarî û Piştevaniya bi Malbatên Girtî û Hikûmxwaran a Marmarayê re (MATUHAYDER) li avahiya DEM Partiyê ya Sancaktepeyê ya Stenbolê hatiye destpêkirin, di roja 44’an de didome.
Rêxistina navçeya Ataşehîrê ya DEM Partiyê û gelek jin çûn serdana çalakiya Nobeta Edaletê.
Di çalakiyê de ev peyam hatin dayîn: “Vîna jinan îradeyeke bi hêz e. Ji vê hêzê ditirsin. Heta jin azad nebin yek ji me azad nabe. Zarokên gelê Kurd berdêlên mezin dan. Divê em layiqî têkoşîn û berxwedana wan bin. Şerê ku dewlet dimeşîne bandorê li hemûyan dike. Ji rêberê me tu agahî tuneye. Heta ku em bigihêjin armanca xwe em ê di her qada jiyanê de li ber xwe bidin û têkoşîna xwe bidomînin.”
ÎZMÎR
Nobeta Edaletê ya ku ji aliyê Komeleya Alîkariya bi Malbatên Girtî û Hikûmxwaran a Egeyê (EGE TUHAYDER) û Tevgera Jinên Azad (TJA) ve li Îzmîrê hatiye destpêkirin di roja 14’an de didome. Parlamentera DEM Partiyê ya Îzmîrê Burcu Gul Çubuk, rêveberên DEM Partiyê û gelek kes Nobeta Edaletê ya li nûnertiya DBP’ê ya Herêma Egeyê tê lidarxistin, ziyaret kirin.
Burcu Gul Çubuk got, “Faşîzma AKP-MHP’ê li girtîgehan plansaziyeke ku zext, tecrîd û sirgûnan zêde dike, pêk tîne. Ji destpêka greva birçîbûnê ve cezayên girtîgehê li malbatan tê birîn û li Girtîgeha Menemenê jî ceza li girtiyan hatiye birîn. Divê em bêdengiya ku îro jî didome bişkînin. Pêwîste li dijî tecrîda li Tirkiyeyê em dengê xwe bilind bikin.”
Dayika Aştiyê Nufusa Ataç got, “Heta ku tecrîd rabe wê çalakî bidomin. CPT û Ewropa çima dengê xwe bilind nake? Em dixwazin her kes dengê xwe bilind bike û tecrîd rabe.”
Hevserokê navçeya Menemenê ya DEM Partiyê Ekrem Karakoç jî diyar kir ku heta gelê Kurd azad nebe gelê Tirk azad nabe.
