Şaxa ÎHD’ê ya Amedê û xizmên windayan di hefteya 887’an a çalakiyê de li ber Bîrdariya Mafê Jiyanê ya li Parka Koşuyolu ya li navçeya Rêzan a Amedê kom bûn. Di çalakiyê de wêneyên windayan hatin hildan. Faîlên Mehmet Tekdag ê ku 12’ê Sibata 1993’yan li Amedê di encama êrîşa çekdarî de hate qetilkirin, hat pirsîn.
Çalakiya li Êlihê di hefteya 723’yan de li ber Bîrdariya Mafên Mirovan a li Cadeya Gulistan hate kirin. Di çalakiya vê hefteyê de aqûbeta Cuneyt Aydinlar hate pirsîn ku 20’ê Sibata 1994’an li navçeya Bakirkoy a Stenbolê hate binçavkirin û êdî agahî jê nehat girtin.
Çalakiya li navçeya Gever a Colemêrgê di hefteya 213’an de dewam kir. Di çalakiya li Kolana Hunerê de wêneyên windayan hatin hildan. Çîroka Mehmet Mehdî Akdenîz hate xwendin ku sala 1994’an li Amedê hat windakirin.
Çalakiya rûniştinê ya li Îzmîrê ku her du hefteyan carekê tê lidarxistin, li ber Sumerbanka berê ya Konakê hate lidarxistin. Di çalakiyê de ji rêveberên ÎHD’ê Evrîm Kubîlay axivî. Evrîm Kubîlay aqûbeta Mehmet Nezîr Duman pirsî ku 33 sal in agahî jê nayê wergirtin.
