Di 2’yê Adarê de Seroka Rêxistina Azadiya Jinê Yenar Mihemed li Bexdayê ji aliyê du kesên nenas ve li ber deriyê mala xwe hat qetilkirin. Yenar Mihemed ji bo têkoşîna azadiya jinê ked û xebateke mezin da meşandin. Tevgera Azadiya Jinên Êzidî (TAJÊ) bi daxuyaniyekê qetilkirina Yenar bi tûndî şermezar kir û xwest ji kujera hesab were pirsîn.
TAJÊ di daxuyaniyê de Yenar Mihemed bibîr anî û diyar kir ku Yenar jineke wêrek û têkoşer e û wiha dewam kir: “Me jineke têkoşer a xwedî kedeke bêhemba di têkoşîna jinan de winda kir. Em ji ber qetilkirina Yenar Mihemed hem xemgîn in û hem jî bi hêrs in. Di lêgerîna heqîqeta jinan de jineke dilwêrek bû. Li hemberî qirkirina jinê, li hemberî zordariya mêr-dewletê serî rakir û têkoşîn meşand. Em di rojên pêşwazîkirina roja 8’ê Adarê de ne. Di demeke wiha de qetilkirina Yenar ne rasthatineke, li hemberî têkoşîna jinê sûcekî din ê aqlê mêr-dewletê ye. Jina wêrek Yenar Mihemed di têkoşîna meydanî de mînakeke bêhempa bû, wê jiyana xwe ji bo şerê li dijî pergala mêrsalar û têkoşîna azadiya jinê ya civakî û siyasî veqetand. Rola wê ya dîrokî di gelek qadan de bihêz bû, bi taybetî di doza jinên Êzidî yên dîlgirtî de ew yek ji dengên herî pêşîn bû, bêdengiya cîhanê li hember qirkirinê şikand û bi awayekî meydanî û hiqûqî têkoşîn meşand. Ji bo ku tawanên jenosîdê li qada navneteweyî bide naskirin û sûcdar bêne dadgehkirin torên piştgiriyê ava kirin da ku jinên rizgarbûyî biparêze û rûmeta wan a pîroz li wan vegerîne.”
Di dewama daxuyanî de wiha hate gotin: “Di têkoşîna jinê ew xwedî projeyên polîtîk bû, projeyek fikrî û pratîkî dimeşand ku armanca wê jinê ji rola qurbanî kirinê veguherînê rola pêşengiyê. Dixwest hemû sînorên paşketî û kevneperest ên ku rola jinê di civakê de paşguh dikirin ji holê rabike û bi tûndî li dijî qanûnên ku cudakariyê kûr dikin sekinî. Ji bo jiyana jinên Iraqî biguherîne û wan ji tûndiya hişmendiya dewlet û qanûnên wê biparêze li seranserî Iraqê bû xwedî kedeke mezin. Kuştina Yenar Mihemed di vê demê de, hewildaneke tirsonek e ji bo vemirandina ramanên azad ên ku wê di dilê hezaran jinan de çandî. Em daxwaza vekirina lêpirsîneke navneteweyî û navxweyî ji bo qetilkirina Yenar dikin ku di zûtirîn dem de sûcdar bêne darizandin. Ji bo eşkerekirina kujeran û naskirina doza wê, weke dozeke raya giştî ya cîhanî û parastina mîrasa wê ya têkoşînê da ku saziyên wê di xizmeta jinan û bindestan de berdewam bin. Yenar Mihemed ne çalakvana jin a yekemîne li Iraqê tê kuştin di salên borî de kuştina jinên pêşeng zêde bû, ev dide diyarkirin ku li Iraqê jinên ku ji bo mafê xwe têdikoşin ewlehiya jiyana wan nîne. Kuştina her jinekê polîtîk e. Ji ber ku hêzên desthilat ji têkoşîna jinê ditirsin wê dikin hedefa xwe. Yenar Mihemed di oxira têkoşîna azadiya jinan de hat qetilkirin. Lê mîrasek li pey xwe hişt ku wê ti carî ji aliyê jinan ve neyê jibîrkirin. Wê têkoşîna wê ya ji bo jinên dîlgirtî û rizgarbûyî ji bo me bibe hêza têkoşînê.
Em careke din ji malbata Yenar, hemû jinan û endamên rêxistina azadiya jinê re sersaxiyê dixwazin û dibêjin wê têkoşîna azadiya jinê berdewam bike.”
