Li hola Çand û Hunerê ya Kerkûkê bi amadebûna kesayetên ji beşên cuda yên bajêr, bi boneya çil rojiya şehîd Ehmed Kerkûk ku di dema seferberiya ji bo Rojavayê Kurdistanê de li bajarê Hesekê şehîd bû, merasîmek hate lidar xistin.
Merasîm bi deqeyek rêzgirtin ji bo şehîdan destpê kir. Piştre li ser navê malbatên şehîdên Rojava, Wehab Ehmed gotarek pêşkêş kir û qala rol û girîngiya şehîdan di parastina netew û gelê xwe de kir.
Piştre Waliyê Kerkûkê Rêbwar Teha jî axivî û behsa lehengî û şoreşgeriya Şehîd Ehmed kir. Paşê, gotarek hevbeş ya aliyên siyasî yên Kerkûkê ji aliyê berpirsê duyem ê Yekîtîya Niştîmanî ya Kurdistanê (YNK) Rewend Mela Mehmûd ve hat xwendin û behsa qehremaniya şehîd Ehmed kir ku ji bo parastina ax û gelê Rojavayê Kurdistanê berê xwe da Rojavayê.
Her wiha, gotarek ji aliyê Kerîmî Eleke ve ji bo beşdarvanan hate pêşkêşkirin.
Herî dawî li ser jiyana şehîd Ehmed Kerkûkî sînevîzyonek hate temaşekirin.
Şehîd Ehmed Kerkûkî yê ji Kerkûkê di 20’ê Çileyê de tevlî seferberiya li dijî êrîşên li ser Rojava bû û di 27’ê Çileya 2026’an de li eniyên berxwedanê yên li Hesekê şehîd bû.
