Pîrozbahiyên li gundê Dirêjîk ê Tirbespiyê û gundê Çaxir Bazar ê li Amûdê bi xwendina peyama Rêber Apo destpê kir û bi axaftinan dewam kir.
Li Tirbespiyê, hevserokê Partiya Yekitiya Demokratîk (PYD) Xerîb Hiso axivî û destnîşan kir ku rihê Newroza îsal rihê yekitiya demokratîk a ji bo gelê Kurd li çar parçeyên Kurdistanê nîşan dide. Hiso diyar kir ku bi saya fedakariyên şehîdên azadiyê, doza Kurd dikeve qonaxeke nû.
Hiso di dewama axaftina xwe de diyar kir Newroz agirê azadiyê yê li dijî mêtingeriyê ye û têkoşîna gelê Kurd û berxwedana li dijî mêtingeriyê û koletiyê îro jî dewam dike. Hiso destnîşan kir ku peyamên Rêber Abdullah Ocalan ji bo banga azadî û demokrasiyê ne û got: “Ji ber vê yekê, em jî diyar dikin ku azadiya fîzîkî ya Rêber Abdullah Ocalan dê di têkoşîna gelê me de armanca sereke be.”
Hiso wiha lê zêde kir: “Îro civakên Tirbespiyê yên Kurd, Ereb û Suryan ji bo pîrozkirina Newrozê dicivin, pabendbûna xwe bi peymana 29`ê Çileyê re nîşan didin û mil bi mil dixebitin da ku li Sûriyeyê pergaleke demokratîk ava bikin.”
Ji rêveberên Meclisa Malbatên Şehîdan Selma Xelîl jî destnîşan kir ku rihê Newrozê îsal têkoşîna gelê Kurd nîşan dide. Selmayê got: “Li ser vê bingehê, em wekî malbatên şehîdan, dê têkoşînê bidomînin heta ku hêviyên gelê me pêk werin û azadiya fîzîkî ya rêber Abdullah Ocalan pêk were. “
Selma Xelîl diyar kir ku yekitiya gelê Kurd û piştgiriya Yekîneyên Parastina Gel (YPG) û Yekîneyên Parastina Jin (YPJ) ji tevahiya cîhanê re nîşan daye ku gelê Kurd di şerê li dijî terorê de bi hezaran şehîd dane, ji bo hemû gelên cîhanê hilgirê aştî û demokrasiyê ye.
AMÛDÊ
Di pîrozbahiya Newrozê ya li Amûdê de endamê Meclisa Giştî ya PYD Kenan Berekat bixêrhatina beşdaran kir û Newroz pîroz kir. Berekat got: “Em di rewşeke taybet de ketin sala 2026`an. Dixwestin îrade û hebûna me têk bibin. Lê sekna we bû rojev, dema ku gel got em qebûl nakin çete derbasî Rojava bibin, li Kurdistanê û derveyî welat piştgirî dan sekna gel, yekitiya gelê Kurd di van mehan de xwe isbat kir. Em bi vî rihê yekitiyê bi ser ketin, Rojava bi tenê nema.”
Berekat wiha dewam kir: “Em dixwazin bi awayekî aştiyane, civakî, qanûnî û siyasî doza gelê Kurd bê çareserkirin. Em amadene bi hemû rengê siyasî û diyalogê doza gelê Kurd çareser bikin. Têkoşîna me ji ber dewamkirin xeta azadiyê wê bidome.”
Her wiha endama Meclisa Malbatên Şehîdan a Amûdê Xedîca Efrîn jî axivî û Newroz pîroz kir.
Xedîcayê got: “Bi keda şehîdên xwe em îro Newrozê pîroz dikin, şehîdên me îsbat kir ku yekitiya me pêkane.
Xedîcayê axaftina xwe bi dawî kir: “Em ji Rêbertî re dibêjin ku keda wî vala neçûye, fikra wî li her deverê tê dîtin.”
