Piştî rageşiya dawî ya di navbera DYA, Îsraîl û Îranê de, her çend Kurdistan ne aliyekî şer be jî, herêmên cuda yên Kurdistanê dibin hedef. Di êrîşên li ser deverên sivîl, kampên penaberan û saziyên binesaziyê yên li Rojhilatê Kurdistanê û Herêma Kurdistana Federe de, gelek sivîlan jiyana xwe ji dest dan û gelek kes jî birîndar bûn.
LI TORONTOYÊ BI FINDAN BÎRANÎN HATE KIRIN
Li Qada Sankofayê ya Torontoyê, bi sernavê “Ji bo Jiyana Kurdan Nobet” çalakiyek bi beşdariyeke mezin hate lidarxistin. Di çalakiyê de ji bo bîranîna kesên di êrîşan de jiyana xwe ji dest dane find hatin pêxistin û bi herikbarî dirûşma “Jin, Jiyan, Azadî” hate berzkirin.
Di çalakiyê de tekstekî agahdarkirinê yê bi zimanê Îngilîzî hate belavkirin. Di tekstê de hate destnîşankirin ku her çend Kurdistan ne aliyekî vî şerî be jî berdêlên giran dide û binesazî û cihên sivîl dibin armanc. Her wiha bal hate kişandin ser bêdengiya raya giştî ya navneteweyî û banga destwerdana lezgîn hate kirin.
LI VANCOUVERÊ BANGA ÇALAKİYÊ
Li aliyê din, li Vancouverê di roja Yekşemê 19’ê Avrêlê de, demjimêr di navbera 14:00 û 16:00’an de li ber Galeriya Hunerê ya Vancouverê dê çalakiyek bê lidarxistin. Di çalakiya ku bi sernavê “Kurdan Biparêzin” tê birêvebirin de, dê bal bê kişandin ser êrîşên Îranê.
Di bangawaziyê de hat gotin, “Dema cîhan temaşe dike, Kurd tên bombebarankirin” û bang li raya giştî ya Kanadayê û civaka navneteweyî hat kirin ku bikevin tevgerê. Di daxuyaniyê de hat diyarkirin ku dê qurbaniyên êrîşên dawî bên bibîranîn û piştgirî bê xurtkirin.
Saziyên Kurd destnîşan kirin ku nabe gelê Kurdistanê berdêla şerekî ku ne yê wan e bide û bang li raya giştî ya Kanada û derdorên navneteweyî kirin ku helwesteke tundtir nîşan bidin.
