Parlamentera berê ya Partiya Demokratîk a Gelan (HDP) Nûrsel Aydogan li ser rojevê ji ANF’ê re axivî û anî ziman ku li nava civakê atmosfereke aştiyê bi temamî nehatibe afirandin jî nermbûnek heye. Nûrsel Aydogan diyar kir ku li gel vê yekê jî ji aliyê dmeokratîkbûnê ve desthilatdariyê gaveke şênber neavêtiye.
Ji bo pêvajo veguhere çareseriyeke rasteqîn Nûrsel Aydogan işaret bi vê yekê kir: “Daxwaza gelê Kurd û aştîxwazan ew e ku bi aştiyeke bi rûmet û mayinde çareserî pêk were. Ji bo vê jî yekemîn tişta divê bê kirin guhertina ziman e. Ji ber ku her tişt destpêkê bi ziman destpê dike Li aliyê desthilatdariyê di vê mijarê de pêşketinek hebe jî têrker nîne.
Li hemberî desthilatdariyê, bi taybetî li hemberî AKP bêbawerî dewam dike ku aliyekî pêvajoyê ye. Eger desthilatdarî dixwaze bibe cihê baweriyê -ku divê bixwaze- wê demê divê gavên cihê baweriyê biavêje. Ev jî bi yekbûna gotin û pratîkê dibe. Gotinên bedew û erênî bêguman girîng e, lê belê pêkanîna wan gotinan hîn girîng e.
Ji ber vê yekê jî di çarçoveya ‘Koordînatoriya Pêvajoya Siyasîbûnê û Aştiyê’ ya ku Bahçelî ji bo statuya Birêz Ocalan pêşniyar kir, divê statuya ‘Koordînatoriya Siyasîbûn û Aştiyê’ ya Birêz Ocalan qanûnî bibe. Weke ku ji tecrûbeyên cîhanê tê fêhmkirin, piştî ku ev pêk hat wê pêvajo hîn bi lez bi pêş ve biçe.”
Nûrsel Aydogan ragihand ku piştî statu hate dayin wê Birêz Ocalan karibe li Îmraliyê bi rojnamevan, akademîsyen, siyasetmedar, civaka sivîl, nûnerên rêxistinên civaka demokratîk û beşên cuda yên civakî re hevdîtinan bike. Ev yek jî ji bo civakîbûna pêvajoyê û şikandinan pêşhukman gelekî girîng e.
Ji bo tevlîbûna gerîla ya li nava jiyana siyasî û civakî, berdana girtiyên siyasî, vegera siyasetmedarên li sirgûnê, gelê Kurd ê li Mexmûrê û bêguman azadiya Birêz Ocalan divê qanûneke yekpare bê derxistin. Yanî ji bo ev pêvajo bi ser bikeve pêwîstî bi nexeşrêyekê heye.”
Nûrsel Aydogan destnîşan kir ku gelê Kurd her tim amade ye ku li komara demokratîk bi hev re bi rengekî azad û wekhev bijî û got, “Gerîla jî gelek caran eşkere kir ku dema qanûn hate derxistin ew amade ye li welêt vegere û tevlî siyaseta demokratîk bibe. Niha dor hatiye desthilatdariyê ku ji bo aştî û çareseriyê gavê biavêje.
15 mehên ku derbas bûn nîşanî gelan û desthilatdariyê da ku aştî çiqasî hêja ye. Ji ber vê jî dem hatiye ku desthilatdarî bêyî fikar û gumanan ji bo paşeroja demokratîk a Tirkiyeyê bikeve nava liv û tevgerê.”
