Dengdêrên li Perûyê di tûra duyemîn a hilbijartinan de ji bo diyarkirina serokkomarê nû dengên xwe didin. Hilbijartin di nav bêîstîqrariya siyasî û zêdebûna rêjeya sûc de pêk tên. Keiko Fujimori ya muhafezekar li hember Roberto Sanchez ê çepgir pêşbaziyê dike.
Li gorî anketan, her du namzet ji hêla rêjeya dengan ve pir nêzîkî hev in. Hejmara kêm a dengan ji bo her du namzetan di tûra yekem de nîşan dide ku gelek dengdêr ji namzetan nerazî ne.
KEÇA DÎKTATORÊ BERÊ KEIKO FUJÎMORÎ
Keiko Fujimori ya 51 salî keça Serokkomarê berê yê dîktator Alberto Fujimori ye. Fujimori, ku ji bo cara çaremîn dibe namzet, mîrata siyasî ya bavê xwe diparêze. Alîgirên wê dibêjin ku bavê wê Alberto Fujimori aborî baş kiriye û di şerê li dijî komên çekdar de serketî bû. Lê ew bi gendalî û sûcên li dijî mirovahiyê hate mehkûmkirin.
Roberto Sanchez ê 57 salî ku wezîrekî berê ye, cara yekem e ku ji bo serokkomariyê dibe namzet. Ew bi taybetî ji dengdêrên herêma Çiyayên Andê piştgiriyê werdigire û bi sozên xwe yên guhertin û edaleta civakî derdikeve pêş.
Berî hilbijartinê, Sanchez bi îdîayên sûcên têkildarî fînansekirina kampanyayên xwe yên hilbijartinê yên di navbera salên 2018-2020’an de doz hat vekirin. Sanchez, van îdîayan red dike.
DI NAVA 10 SALAN DE 9’EMÎN SEROKKOMAR TÊ HILBIJARTIN
Namzetê serketî dê li welatekî ku bêîstîqrariya siyasî dewam dike, dest bi kar bike. Perû ji sala 2016’an û vir ve 8 serokkomarên cuda hilbijart.
Pispor, dibêjin ku kî bi ser bikeve jî, ne mimkûn e ku ew di parlementoyê de piraniyê bi dest bixin û wê neçar bimînin ku bi hêzên siyasî yên cûrbecûr re hevkariyê bikin. Hilbijartin ji bo nîşandana ka Perû dikare ji krîza xwe ya siyasî derkeve yan na, girîng tê dîtin.
