Nerazîbûna li hemberî Rahmî Koç a ji ber gotinên wî yên li hemberî jinên Kurd, dewam dike. Li Amed û Wanê did axuyaniyan de nûnerên civaka sivîl û rêxistinên jinan, gotinên Rahmî Koç şermezar kirin.
Li Amedê Meclîsa Dayikên Aştiyê li Parka Koşûyolûyê daxuyanî da û diyar kir ku gotinên cihêkar ên li hemberî nasnameyên etnîkî û jinan, nayê qebûlkirin. Di daxuyaniyê de hate gotin, biçûkxistina jinan an jî henekpêkirina li jinan nabe ku weke azadiya fikrî yan jî mîzahê bê dîtin.
Li Wanê, bi pêşengiya Meclîsa Jinan a KESK’ê li ber avahiya baroyê daxuyaniyek ji çapemeniyê re hate dayin. Di daxuyaniyê de hate ragihandin ku gotinên Rahmî Koç divê weke bûyereke yekane neyê dîtin û hedefnîşandana jinan bi taybetî jî jinên Kurd hate şermezarkirin.
Di çalakiyê de hate gotin, daxuyaniya lêborînê ya ku Rahmî Koç weşand têrê nake û bang hate kirin ku bi rengekî eşkere lêborînê ji jinên Kurd bixwaze.
Rêxistinên jinan diyar kirin ku wê têkoşîna xwe ya li hemberî gotinên cihêkar û zayendîperest dewam bikin û daxwaza ji bo aştiya civakî, wekhevî û mafên jinan dubare kirin.
