Tevgera Civaka Demokratîk (TEV-DEM) a Hesekê têkildarî rewşa jiyanî ya herêmê li Çerxerêya El Itfaiyê ya Hesekê bi amadebûna nûnerên saziyên sivîl û komînan daxuyaniyek da. Daxuyanî ji hêla endamê Yekitiya Rewşenbîran Mihemed Beşîr ve hat xwendin.
Di daxuyaniyê de hat diyarkirin ku ew niha di qonaxên herî zehmet re derbas dibin, aloziyên aborî û debarê kûr dibin. Dabînkirina nan, derman, sotemenî û xizmetguzariyên sereke bûne barekî mezin li ser milê her malbatekê.
Di daxuyaniyê de hat destnîşankirin ku polîtakayên aborî yên tên dîtin hiştiye ku sotemenî, kehrebe, madeyên xwarinê û derman biha bibin. Xizanî û betalî berfireh bibe û gendelî jî zêde bibe. Li kêleka dîtina zehmetiyan di dabînkirina sotemeniyê de, bilindbûna buhayên benzîn, mazot û gazê, binesazî û xizmetguzariya giştî jî lawaz e, ev dihêle ku metirsiyên têkildarî jîngehê û tenduristiyê zêde bibin.
Di daxuyaniyê de behsa Peymana 29`ê Çileyê hat kirin û hat diyarkirin ku wan ev peyman bi rihekî ku ew ji bo anîna ewlehî û îstiqrarê, vegera ewle ya koçberan, destpêkirina qonaxeke nû ya aştî û xebata hevbeş pêşwazî kir. Hîn jî baweriya wan heye ku diyalog çareseriya herî rast e ji bo parastina mafên hemû gelan û avakirina Sûriyeya demokratîk e. Lê serkeftina lihevkirineke siyasî girêdayî başkirina jiyana mirovan e. Çareseriya aloziya heyî îradeyeke siyasî û aborî ya ku divê bi berpirsyariya xwe rabe, dixwaze.
Di daxuyaniyê de ev daxwaz ji hikumeta veguhêz û Rêveberiya Xweser hatin kirin:
“- Divê polîtîkayên ku dihêlin bihabûn çêbe bên rawestandin, divê sotemenî bi buhayên adilane û biîstiqrar were dabînkirin.
– Divê piştgirî ji bo sektora çandiniyê bê dayîn û pêwîstiyên berhemdayînê bên dabînkirin, ji bo berhemên xwedî stratêjîk jî buhayên adilane werin dayîn û parastina ewlehiya xwarinê pêk were.
– Divê xizmetguzariya sereke ya kehrebe, av, tenduristî, xebat, nan û rê bê başkirin, binesazî were sererastkirin.
– Divê li gorî rewşa debarê ya şêniyan buhayê kel û pelan were esasgirtin, gumrik bê kêmkirin û rê li ber gendeliyê bê girtin.
– Divê aboriya herêmî bi piştgirîdayîna istismar û berhemdayînê bê aktîvkirin, derfetên xebat bên zêdekirin, bi taybet ji bo ciwan û jinan.
– Divê dosya pevguhertina pereyên kevin bi yên nû bê çareserkirin.
– Vegera ewle ya koçberan pêk were.
– Azadiya giştî were parastin, azadiya nerînê û xebatên siyasî bên misogerkirin, beşdariyeke demokratîk a ji bo hemû pêkhateyên li Sûriyeyê were pêşxistin.
– Divê ji bo çareseriya siyasî ya demokratîk a giştî xebatek bê meşandin.”
