Endamê Komeleya Alimên Olî ya Amedê Mahmût Şik pêvajoya aştiyê û êrişên li ser Rojava ji ANF’ê re nirxand û li ser rojevê got, “Hûn jî zanin ku Rêber Apo par di 27’ê Sibatê de bangeke dîrokî kir û pêvajoya çareseriyê da destpêkirin. Rêbertî 26 sal in di nava çar dîwaran de ye. Ev 26 salên xwe di pêvajoya zindanê de jî da aştiyê. Ev gel û ciwanên vî gelî yên li ser şopa Rêber Apo ne, 50 sal in li hemberî siyasetên qirêj ên vê sîstemê têkoşiyan. Vî şerê qirêj bandor li tevahiya gelê Kurdistanê kir. Rêbertî hewl dide ku vî şerê qirêj bi dawî bike.
Di nava çar dîwaran de bûyerên li cîhanê baş dixwîne û dinirxîne. Ji ber vê yekê ji bo aştî bê ser vê xakê çi ji destê wî tê dike û pêvajoya aştiyê da destpêkirin. Pêwîstiya çar parçeyên Kurdistanê bi aştiyê heye. Rêbertî ev yek danî holê. Lê belê sîstema ku em di nav de ne, em dibînin ku ji bo pêkanîna aştiyê gavên pêwîst neavêtiye. Gelê Kurd ji bo aramiyê her tim têkoşiya. Vê sîstemê di nava herikîna dîrokê de her tim xwest, me di bin otorîteya xwe de bihêle û em tine hesiband.
Eger wê aştî bê kirin, ev aştî bi gavên yek alî bi pêş ve naçe. Dewleta Tirk aştiyê niha bi gotina ‘teslîm bûn’ nîşan dide. Ev rewş ne ya qebûlkirinê ye. Tu hewl dide bi sîstemeke welê re aştiyê bike ku te, ziman, nasname û çanda te tine dihesibîne. PKK’ê îro bi navê aştiyê berpirsyariyên xwe bi cih anî. Em jî dixwazin aştiyeke bi rûmet pêk were; lê belê nêzîkatiya dewleta Tirk a li pêvajoyê hêviya me ya bi aştiyê lawaz dike.”
‘AZADIYA RÊBER APO AZADIYA GELÊ KURD E’
Şik destnîşan kir ku azadiya fîzîkî ya Rêber Apo azadiya gelê Kurd e û got, “Azadiya Rêbertî azadiya gelê Kurd e. Rêber Apo aştî kiriye rêya bingehîn û têkoşîna xwe li ser vê yekê daniye rûniştandin. Gelê Kurd jî wî weke îradeya xwe dibîne, azadiya wî weke azadiya xwe dibîne. Mercê bingehîn ê aştiya mayinde azadiya Rêber Apo ye. Dema ku Rêbertî azad bû wê pêşî li aştiyê vebe.
Gelê Kurd dixwaze azadiya Rêber Apo tavilê pêk were.”
‘PÊVAJOYA AŞTIYÊ LI ROJAVA XITIMÎ YE’
Mahmût Şik destnîşan kir ku êrişên li ser Rojava pêvajoyê sabote dikin û got, “Eger mirov bibêje ku pêvajo li Rojava xitimî ye, ev ê bibe nirxandineke rast. Li çar parçeyên Kurdistanê êriş li Kurdan tê kirin. Halbûkî Kurd tenê aştiyê dixwazin. Li aliyekî tu yê bibêje ku li vê derê bi Kurdan re aştiyê dike, li aliyê din ji bo gelê Kurd li Rojava nebe xwedî statu çi ji destê te bê tu yê bike. Li dijî Kurdan bi çeteyên ku dewama mejiyê DAÎŞ’ê ye tevdigerin.
Li dijî vî mejiyê ku sîstema cîhanê xera dike, mirovan qetil dike gelê Kurd her tim têkoşiya. Sîstemek welê li hemberî me heye ku bi kesên ku bi gotina ‘Allahû Ekber’ mirovan qetil dikin û Kurdan tine dihesibînin tevdigere. Gelê Rojava li gel ku dibêje ku ti pirsgirêka wan bi Tirkiyeyê re nîne, dibe hedefê. Yên ku îro li Helebê têkoşiyan û di wê rêyê de şehîd bûn rûmeta vî gelî ne. Em bi rêzdarî bejna xwe li ber têkoşîna wan ditewînin.
Li hemberî 45 hezar çeteyan berxwedaneke dîrokî nîşan dan. Ew rûmeta me ne, em piştgiriyê didin berxwedana wan. Ew şehîdên vê têkoşîna mafdar in.”
