Di encama êrişên dewleta Tirk û çeteyên wê yên salên 2018 û 2019’an de, her wiha êrişên li dijî rejîma Baasê (27’ê Kanûna 2024) û êrişên di 6’ê Çileyê de ku ji aliyê çeteyên dewleta Tirk û hêzên hikumeta demkî ya Şamê ve pêk hatin, bi giştî 450 hezar kes ji Efrîn, Şehba, Heleb, Serêkaniyê û Girê Spî koçberî Rojavayê Kurdistanê bûn.
Rêveberiya Xweser a Bakur û Rojhilatê Sûriyeyê û Hêzên Sûriyeya Demokratîk (QSD) ji sala 2018’an ve ji bo vegera ewle ya koçberan di nava hewldanan de bûn.
Peyman di navbera QSD û hikumeta demkî ya Şamê de çêbûn û vegera koçberan jî tê de cih girt. Herî dawî peymanek 29’ê Çileyê (2026) di navbera QSD û hikumeta demkî ya Sûriyeyê de hat îmzekirin û 30’ê Çileyê hat aşkerakirin. Vegera koçberan wek xalek girîng a peymanê hat diyarkirin.
Li herêma Cizîrê ya Rojavayê Kurdistanê 7 hezar 426 malbatên ji Efrînê li dibistan, mizgeft û navendên saziyan bi cih bûne.
16’ê Sibatê Kombenda Efrînê ya Civakî, Meclisa Koçberên Efrîn û Şehbayê û nûnertiya civaka sivîl a Ewropayê ragihand ku dê koçberên Efrînê di demeke kurt de dest bi vegera li warê xwe bikin. Wek destpêk jî, dê derdora 400-500 malbat vegerin navçeyên Cindirês, Mabata û Şiyê yên Efrînê.
Li gorî Meclisa Koçberên Efrîn û Şehbayê ji bo vegera koçberan amadekariyên dawî tên kirin. Di navbera NY û meclisê de hevdîtin li ser ewlehî û pêwîstiyên vegerê tên kirin.
