Bihar bi xweşikbûna xwe re me pêşwazî dike. Her 4’ê Nîsanê ji me re dibe zayîneke nû, afirandineke nû û têkoşîneke nû. Di Serdema Qehremantiya Jinan de roja rojbûna Rêber Apo, di kûrahiya dîrokê de rastiya têkoşînê û gava avêtina nû temsîl dike. Xwedawendên Azad ên ku bi salan têkoşîn kirin, şer kirin û di encamê de gihîştin lûtkeya serfiraziyê, dîtin ku jiyan bi hûnandina hest û fikrên azad ve xweşikbûna xwe dide nîşandan. Di van çend salên dawî de bihar bi wateya xwe ya zayînê de zindîbûna xwe bêhtir nîşan da. Li her qadên ku têkoşîna azadiyê dihat dayîn, bi têkoşîna Rêber Apo re hîskirina xwezayê derket pêş.
Tê zanîn ku wateya 4’ê Nîsanê bi rojbûna Rêber Apo re temsîla rojbûna jina azad dike. Di heman demê de hebûna gelê Kurd û rastiya têkoşîna azadiyê nîşan dide. Gundê Amara di sala 1949’an de şahidiya vê pîroziyê kir. Rêber Apo hê di zaroktiya xwe de têkoşîna xwe li hemberî gundiyên Amara dabû destpêkirin.
Pîroziya Rihayê bi dayikbûna Rêber Apo re rastiya gelê Kurd derxist holê. Gelê Kurd Rêbertiyek wisa pîroz nas kir, hez kir û qebûl kir. Ev rastî ne tê guhertin ne jî tê tunekirin. Hişmendiya azadiyê bi têkoşîna azadiyê ve ket 77 saliya xwe. Rastiya Rêber Apo; ji bo gelan, ji bo jinan, ji bo mirovên ku têkoşîna xwe tu carî bernedan, îfadeya azadiyê temsîl dike. Roja rojbûna Rêber Apo bi berxwedaniyên şehîdan re gihîşt asta herî jor.
4’ê Nîsanê; mirovên ku bi felsefeya Rêber Apo bawer dikin û têdikoşin, wateya vê ji kûr ve hîs dikin û meşa xwe xurt dikin. Gerîlayên HPG’ê û YJA Starê jî bi wesîleya roja dayikbûna Rêber Apo re hest û fikrên xwe anîn ziman.
‘GAVÊN AZADIYÊ RIZGARIYA GELÊ KURD DAFIRÎNIN’
Gerîlayê HPG’ê Hawar Kobanê ji bo 4’ê Nîsanê nirxandinên xwe wisa anî ziman: “Destpêkê, roja
dayikbûna Rêber Apo, li beramberî dayika Ûweyş em bejna xwe ditewînin. Dayikbûna Rêber Apo ji bo me ronahiyek e. Ji bo tevahî gelên cîhanê, gelên bindest û gelên azadîxwaz wekî rojbûnekê ye. Em 4’ê Nîsanê ne tenê ji bo Rêber Apo pîroz dikin, di heman demê de wekî rojbûna hemû gelên bindest, berxweder û azadîxwaz pîroz dikin. Em jî wekî mîlîtanên Rêber Apo gavên xwe li gorî vê diavêjin; ev gav gaveke azadiyê, berxwedanê û şoreşê ye.
Jinên ku di têkoşînê de cihê xwe girtin, Rêber Apo ji bo wan bû bingehekî esasî û rêya rast. Yên ku
Rêber Apo nas kirin û ew wekî şervanê vê dîtin, yên ku Rêber Apo xwendine û bi Rêber Apo bawer in, tu xeteke din ango jiyaneke cuda nabînin. Hemû kesên ku Rêber Apo fêm kirine, dixwînin û lêgerîna wan çêbûye, ev yek zêdetir hezkirinekê dide avakirin. Rêber Apo 27 sal in li Îmraliyê têkoşîneke bênavber dide meşandin. Ev berxwedaniyeke mezin û zanînekê dide avakirin; ev jî hezkirinê dide çêkirin. Di serî de bi wesîleya 4’ê Nîsanê, roja dayika Ûweyş û jinên têkoşer, gelê azadîxwaz û yên ku lêgerîna heqîqatê bernedan pîroz dikim. Ev sal wê bibe sala azadkirina fîzîkî ya Rêber Apo. Em dixwazin îsal Rêber Apo di nav tevgerê de û di nav gel de bibînin.”
‘RÊBER APO; HEBÛN Û ÎRADEYA XWE NASKIRIN E’
Gerîlaya YJA Starê Destîna Ronahî, girêdayî zayîna Rêber Apo bi vî awayî nêrînên xwe anî ziman û got: “Di serî de rojbûna Rêber Apo li tevahî gel û malbata wî pîroz dikim. Rêber Apo ji bo azadiya jinan xwedayekî mezin e; ji bo ku jin bibin xwedî nasname û îradeyeke azad, Rêbertî têkoşîneke mezin da. Ji ber vê yekê, ez ji hemû jinan re dibêjim ku tevlî fikrê azad ê Rêber Apo bibin.”
Destîna Ronahî girêdayî rastiya Rêber Apo wiha bi lêv kir û got: “Rastiya Rêber Apo rastiyeke wisa ye ku her kes nikare bîne ziman; ji ber ku rastiya Rêber Apo ji bo her jinekê xwe naskirin e, ji bo her jinekê gerdûnek e. Ez wekî şervana YJA Starê, jiyana bi Rêbertî re jiyana herî xweş û watedar dibînim. Rastiya Rêbertî di hundirê Rêbertî bi xwe de veşartiye; heke tu wê rastiyê jiyan nekî, mirov nikare rastiya Rêbertî nas bike. Lewre ev rastî ji bo me jinan îfadeya hebûn, îrade û nasnameya me dike. Em çiqasî vê rastiyê nas bikin, em ê ewqasî bikaribin xwe, şehîdan û gerdûnê nas bikin.”
Gerîlaya YJA Starê di dawiya nirxandinên xwe de bal kişand ser têkoşîna xwe ya kesayetî û wiha got: “Bi îradeyeke azad ez beşdarî Tevgera Apoyî bûm; bi vê biryarê jî ez ê asta têkoşîna xwe bi azadkirina fîzîkî ya Rêber Apo ve misoger bikim û armanca dîtina Rêber Apo bînim cih. Di dawiyê de zayîna Rêber Apo li hemû kesên azadîxwaz pîroz dikim.”
‘ZAYÎNA RÊBER APO ZAYÎNA JIYAN Û FELSEFEYEKE NÛ YE’
Gerîla Norşîn Koçer Garzan bi pîrozkirina zayîna “Rojê” dest bi nirxandinên xwe kir û wiha anî ziman: “Zayîna Rêber Apo zayîneke normal nîne; jidayikbûna Rêber Apo jidayikbûna jiyan û felsefeyeke nû ye. Kurdên ku bi qirkirin û asimilasyonê re rû bi rû dihatin, bi derketina Rêbertî ve ji nû ve li kok û dîroka xwe vegeriyan. Me bi Rêber Apo re xwe nas kir, cewher û rastiya xwe nas kir. Rêbertî ji bo me hemûyan nexşerê ye, ji ber ku fikrê ku pêşkêşî me kiriye vê yekê îfade dike.”
Di domandina axaftina xwe de gerîla Norşîn wiha got: “Ez wekî gerîlayekê, ji tevlîbûna xwe ve heta kêliya niha, bi kelecaneke mezin ve li benda dîtina Rêbertiyê me. Bêguman bi xwendina pirtûkên Rêber Apo re em her xwe nêzî wî dibînin û em Rêbertî ji xwe dûr nabînin; lê belê daxwaza me ew e ku em bi fîzîkî Rêberê xwe bibînin.”
Gerîla Norşîn bi biryara bilindkirina asta têkoşînê dawî li axaftina xwe anî û wiha bi lêv kir: “Heya ku em azadiya fîzîkî ya Rêber Apo misoger nekin, em ê dev ji têkoşîna azadiyê bernedin. Bi hevgirtina gelê xwe re em ê roja azad misoger bikin. Careke din li her çar aliyên Kurdistanê zayîna Rêbertî li gelê me pîroz dikim û dibêjim ku rojbûna Rêbertî rojbûna me hemûyan e.”
