Hevseroka Bajarê Stenbolê ya DEM Partiyê Arîfe Çinar diyar kir ku ji bo gel, baweriyên li Tirkiyeyê di nava şert û mercên wekhev û azad de bijîn, divê xwedî li pêvajoyê bê derketin ku bi banag Rêber Apo destpê kir. Arîfe Çinar got, “Pêvajoyeke ku divê derdorên kedkar û gel di nav de bin. Avakirina civaka demokratîk wezîfeya me hemûyan e.”
DEM Partiyê di kongreya xwe ya 22’ê Sibatê ya li Stenbolê de rêveberiyeke nû hilbijart. Arîfe Çinar û Çinar Altan bûn Hevserokên Stenbolê yên DEM Partiyê. Hevserokan diyar kirin ku di dema nû de wê partî li Stenbolê hîn mezin bibe.
Hevserokên Bajarê Stenbolê yên DEM Partiyê qalê kirin, bê li Stenbolê di pêvajoya nû de çi bikin.
Altan diyar kir ku di navbera 9’ê Adarê û 15’ê Adarê de wê bi civînên gel qala pêvajoyê bikin û ji bo vê dest bi kar kirine. Altan anî ziman ku ji bo pêngava nû veguhere pêvajoyekê rê vebûye. Altan ragihand ku rê û rêbazên nû yên têkoşînê wê bêne afirandin, yên heyî wê biguherin, cihêreng bibin, bandora siyaseta demokratîk wê zêde bibe û got, “Li bajarekî weke Stenbolê ku ji bo siyaseta Tirkiyeyê diyarker e, gelekî girîng e ku ev yek bi lez şênber bibe. Ji ber vê yekê li 9 nuqteyên Stenbolê; li sê herêman, wê civînên gel bêne lidarxistin. Wezîfeya me ye ku em ji civata xwe re ragihînin, nîqaş bikin û bikin ku fêhm bikin û bi berpirsyarî rabin. Di heman demê de em ê bang li her kesî bikin ên ku pirsên wan hene, her wiha amade ne ku bi berpirsyarî rabin. Heta ji me bê em ê hewl bidin îradeyeke civakîbûyî derxînin holê.”
BANG JI BO HER KESÊN AŞTÎXWAZ E
Altan destnîşan kir ku aştiyeke bi rûmet a ku xwe dispêre wekheviyê hesreta gelek derdorên civakî ye û got, “Aştiyeke bi rûmet, têkoşîna xweser ji bo her beşên civakî gelekî girîng e. Em dixwazin bibin pêşengê wê yekê ku bi daxwazên xweser ên beşên civakî piştgiriyê bidin aştiyê. Eger em karibin vê bikin, hingî em ê karibin aştiyê civakî bikin.”
DI NEWROZÊ DE BEYANA ÎRADEYÊ
Altan diyar kir ku Newroz wê ji bo xwedîderketina li bangê bibe beyana îradeyê û got, “Em wateyeke bi vî rengî didin Newrozê. Em ê li ser tevlîbûna li vê beyana îradeyê xwe bi rêxistin bikin. Ne tenê gelê Kurd û dostên wan, divê her beşên civakê tevlî qada Newrozê bibin.”
KARÊN JI BO JINAN
Hevserok Arîfe Çinar jî bal kişand ser talankirina keda jinê ya li Stenbolê û anî ziman ku beriya 8’ê Adarê wan karên xwe yên ji bo jinan zêde kirin. Arîfe Çinar got, “Li Stenbolê nifûseke zêde ya gelê Kurd, kedkar û jinên kedkar heye. Ber bi 8’ê Adarê re rojevbûyîna aştiyê girîng e. Bi rêya meclîsên me yên jinan wê hevdîtin bi jinên ji dînamîkên civakî yên cuda re li ser aştiyê bê lidarxistin. Gelekî girîng e ku ev bang li qadan bê nîşandan. Stenbol di heman demê de bajarek e ku encama şer herî zêde lê xuya dike. Em dibînin ku kedxwarî li jinê tê kirin. Têkildarî vê yekê karê me heye. Em ê hewl bidin xwe bigihînin qadeke berfireh a jinan. Eger wê rêya siyaseta demokratîk bê vekirin ev yek wê bi têkoşîna jinê bibe. Em ê vê yekê hîn berfireh bikin, li her qadê temsîliyeta wekhev belav bikin û têkoşîna xwe dewam bikin.”
NEWROZA LI STENBOLÊ WÊ DI 23’Ê ADARÊ DE BE
Arîfe Çinar diyar kir ku Newroz wê di 23’ê Adarê de li Stenbolê bê pîrozkirin, ji bo vê jî dest bi kar kirine û got, “Ji bo jiyana wekhev û azad a bawerî û gelên li Tirkiyeyê divê em xwedî li vê pêvajoyê derkevin. Pêvajoyeke welê ye ku divê gel, kedkar di nav de bin. Avakirina civaka demokratîk wezîfeya me hemûyan e.”
