Kongreya Neteweyî ya Kurdistanê (KNK) bi daxuyaniyeke nivîskî 13 saliya Şoreşa Rojavayê Kurdistanê piroz kir.
KNK’ê di daxuyaniya xwe de bal kişand ser destpêkirina Şoreşa Rojava û ev yek anîn ziman: ‘’Rojavayê Kurdistanê ji mêj ve bû ku xwe ji şoreşê re amade dikir. Ji Dêrikê, Qamişloyê, Amûdê, Serêkahniyê, Kobaniyê, Efrîn û pêkve erdnigariya Rojavayê Kurdistanê ji her alî ve xwe amade dikir ku li çarenûşa xwe xwedan derkevin û li ser axa xwe îdareyeke xwe ava bikin. Di wan şert û mercên aloziya navxweyî ya Sûriyeyê de, Kurd û Kurdistaniyan hêza xwe kirine yêk û da ku li Rojavayê Kurdistanê valahiyeke desthilatî çênebe, xwe zûtirîn dem organîze û xurt kirin û ji Kobaniyê pê ve li milê rojhilatê heta Dêrikê, li milê rojava jî heta Efrînê, bajar, bajarûk, gund û mezra hilgirtine bin ewlehiya hêza navxweyî. Ev 13 sal in ku Kurd û Kurdistaniyan bi bedelên gelek giran prosesa xweseriyê domandin û bi modelê Kantonan be, bi rê û rêbaz, form û statuyên din be xwe ragirtin û bi awayekî pratîkî xweseriyeke demokratîk ava kirin.’’
KNK’ê di dewama daxuyaniya xwe de bal kişand ser êrîşên li ser herêmên Bakur û Rojhilatê Kurdistanê û wiha pêde çû: ‘’Ji destpêkê dagîrkerên Kurdistanê ji vê rûdana nû ya Kurd û Kurdistaniyan a li Rojavayê Kurdistanê nerazî bûn. Bi taybetî Tirkiyeyê her di serî de berê tîrên xwe yên bijehrî dane ser Rojavayê Kurdistanê. Kobanî bo xwe kirine hedefa yêkemîn. Ji ber ku bizava li welatê xwe xwedanderketinê ji wê derê dest pê kiribû. Berê Îslamîstên tundrew û DAIŞ’a xwînawî dane ser Kobaniyê. Kobaniyê bi şereke bilind û serfiraz berevaniyeke efsanewî ya axa xwe kir û DAIŞ’ê jî di nav de serê hemû neyaran çemand û xwe parast û têkoşîna xwe kire dastan. Dewleta Tirkiyeyê şikesteke mezin xwar di têkoşîna parastina Kobaniyê da. Vê carê Efrîn bo xwe kire hedef. Ji ber ku navçeya herî nêzîk ya Deryaya Spî bû. Ewil bi armanca dorpêçkirina Efrînê dest bi dagîriya Ezaz û Cerablusê kirin û ji navçeya xweser ya Cizîrê ve birîn. Paşê jî tank û topên xwe zivirandine ser Efrînê û dagîr kirin, xelkê Efrînê bi darê zorê dane koç kirin. Îro demografiya Efrînê serûbin kirine û Tirk û Ereb bi cih kirine. Piştra berê xwe dane Serêkaniyê û Girê Spî û ew der jî dagîr kirin. Gefa xwe ya li ser bi temamê rojavaya Kurdistanê jî didomînin. Li navçeyên di bin desthilat û ewlehiya îdareya xweser ya rojavaya Kurdistanê da, bi dron û gelek teknolojiyên din yên leşkerî û istixbarî kuşt û kuştdariyeke xedar kirin. Jiyana xelkê sivîl jî veguherandin dojehê. Digel vê bêperwatiya dewleta Tirkiyeyê jî berxwedana xelkê rojavaya Kurdistanê bi xurtî dewam dike û hemû dînamîk û mekanizmayên îdareya xweser ji bo ewlehiya xelkê navçeyê têkoşîneke serbilindane didin.’’
Dewama daxuyaniya KNK’ê bi vî rengî ye:
‘’Niha li Sûriyê rewşeke nû heye. 7 meh pêşiya niha rejima BAAS’ê têk çû û Şam kete destê hêzên Islamî. Dema rejîma BAAS’ê têk çû, di heman demê de hêzên girêdayî dewleta Tirk êrîşê deverên Rêveberiya Xweser jî kirin. Teybetî li Şehba yê, li Helebê û li Minbicê êrîşên xwe berfireh kirin. Li devera Tişrînê şerên gelek giran rû dan. Li hemî eniyan dewleta Tirk bi hêzên xwe yên hewayî û bejayî, piştgirî da ew komên tundrew. Hinek dever ketin destê wan komên girêdayî dewleta Tirk. Li gel hemî êrîş û gefan jî, Rêveberiya Xweser xwe parast û êrîş dane rawestan.
Di gel van komplo, arêşê û aloziyan jî li Rojavayê Kurdistanê xelkên navçeyê bi giştî û bi hev re li ser xeta parastina welêt berxwedana xwe didomînin. Di vê têkoşîna şoreşgerî ya li Rojavayê Kurdistanê, divê rola jinan neyê jibîrkirin, bi taybetî rola jinan di dereceya pêşiyê de ye û bi rengekî erênî gelek tesîrdar e.
Niha bi desthilata Şamê re şerrawestandinek heye û bi rêya diyalogê lêgerînên çareseriyê hene. 10’ê Adarê peymanek bi deshilata Şamê re hate îmzekirin. Ji bo çareseriyê niha hevdîtin hene. Lê rewşa Sûriyeyê bi giştî aloz e û ne diyar e wê pêşeroja Sûriyeyê çi be û wê çi nebe. Deshilata Şamê pêşiyê êrîşî Elewiyan kir û li devera Lazkiyeyê komkujî pêk anîn. Niha jî êrîşî Durziyan dikin. Ji xwe bawermendên Mesîhî ji roja pêşî ve di bin zextekî mezin de ne. Ev deshilat li şûna çereseriyê bi xwe re bîne, ji roja pêşiyê ve ye bûye bingeha pirs û pirsgirêkan.
Deshilata Şamê eger imkan û derfetan bi dest bixe, heman muameleyê wê li gel Kurdan û deverên Rêveberiya Xweser jî bike. Ev rewşeke xeternak e û divê em hemû Kurdistanî li ser vê rewşê hişyar bin. Divê di sêrî de em hewl bidin pirs û pirsgirêkan bi rêya diyalogê çareser bikin. Lê divê em parastina xwe jî xurt bikin da ku kesek nekare êrîşê deskeftiyên me bike. Parastina Rêveberiya Xweser parastina Kurdistanê ye.
Bi vê boneyê em wekî KNK’ê di 13 saliya Şoreşa Rojavayê Kurdistanê de, xelkên Kurdistanê û hemû rêveberiya polîtîk, îdarî, asayişî û leşkerî pîroz dikin.
KNK daxwazê ji hemû Kurd û Kurdistaniyan dike ku ji bo parastin û jiyandina Rêveberiya Xweser ya Bakur û Rojhilatê Sûriyeyê û axa welêt û hemû welatiyan, di asta herî bilind de piştevaniyeke xurt û mezin bikin û beramberî hemû êriş û bizavên dagîrkerî û birandinê, mil bi milê xelkên rojavaya Kurdistanê bin.
Şoreşa neteweyî û niştimanî ya demokratîk ya Rojavayê Kurdistanê serkeftî û serfiraz be!
Bijî berxwedan û serkeftina Şoreşa Rojava ! ‘’
