Berdevka Partiya Wekhevî û Demokrasiyê ya Gelan (DEM Partî) Ayşegul Dogan têkildarî civîna Desteya Rêveberiya Navendî (MYK) ku hêj didome û geşedanên di rojevê de li navenda giştî ya partiyê daxuyaniyê da.
Ayşegul Dogan bal kişand ser çalakiyên li Stenbolê hatin destpêkirin û got, “Ji ber vê yekê em li kolan û qadan in. Ji ber gelek sedeman em nerazîbûna xwe dikin yek. Em daxwazên xwe yên wekhevî, azadî û edaletê bilind dikin.”
Ayşegul Dogan got, “Civîna me ya Lijneya Rêveberiya Navendî bi nirxandina pîrozbahiya Newrozê dest pê kir. Yek ji mijarên me yên sereke jî ev bû. Pîrozbahiya Newrozê ya ku me di 11’ê Adarê de dabû destpêkirin, wê sibe li hinek cihan bidome. Em dikarin bibêjin ku ji duh ve temam bûye. Hefteya Newrozê bi pîrozbahiyê bi heybet doh bi dawî bû.”
YÊN DIBÊJIN, ‘KURD ÇI DIXWAZIN?’ BILA LI NEWROZÊ BINÊRIN
Ayşegul Dogan banga dîrokî ya 27’ê Sibatê ya Rêber Apo bi bîr xist û destnîşan kir ku ev bang deriyekî nû vekir û anî ziman ku pîrozbahiyên Newrozê firsenda dîrokî xurtir kir û wiha domand: “Bi milyonan kes bi heybet xwedî li aştî û civaka demokratîk derketin û gotin ‘Em li vir in, em amade ne’. Yên dibêjin, ‘Kurd çi dixwazin?’ Bila li qadên Newrozê binêrin. Bila li qadên Newrozê yên ku ji 11’ê Adarê û vir ve bi hezaran, bi sed hezaran, bi milyonan li hev kom bûne û bi hev re govend gerandin binêrin. Ji kerema xwe bila li wan pîrozbahiyan binêrin. Yên ku pirsa ‘Di pirsgirêka Kurd de muxatab kî ye?’ dikin, bila ew jî li qadên Newrozê binêrin.”
DIVÊ DAXWAZA DEMOKRASIYÊ BÊ DÎTIN
Ayşegul Dogan diyar kir ku ji qadên Newrozê heta Saraçhaneyê enerjî û potansiyela Tirkiyeyê hatin ba hev û wiha pêde çû: “Daxwaza hevpar a azadî, demokrasî û wekheviyê ji qadên Newrozê heta Saraçhaneyê bilind bû. Divê ev daxwaz baş bê bihîstin û neyê paşguhkirin. Divê bi komplo, lîstik û sabotajê vala neyê derxistin. Yên ku dixwazin vala derxin, wê li ber vîna gel têk biçin.”
HELWESTA ME ZELAL E, ALIYÊ ME DIYAR E
Di berdewamiya axaftina xwe de Ayşegul Dogan wiha got: “Divê ti kes li ser hilbijêrên DEM Partiyê û DEM Partiyê dijminatî û dijberiyê neke. Di vê mijarê de em bi awayekî zelal û jidil wan hişyar dikin. Divê ti kes DEM Partiyê, hilbijêrên DEM Partiyê, gelê Kurd û yên ku bi gelê Kurd re têdikoşin nekin dijminê xwe. Berê me ev yek îspat kiriye û niha ne hewceye ku em carek din îspat bikin. Em alîgirê azadiyê, hiqûq û wekheviyê ne. Em ji bo her kesî Tirkiyeke demokratîk dixwazin.
LI SER NEWROZÊ ZIMANDIRÊJIYÊ NEKIN!
Haya me ji her tiştî heye û em dibînin. Weke partiyeke heta îro bedelên herî giran daye, em bêedaletî, newekhevî, neheqî û nebûna demokrasiyê çi ye ji her kesî bûhtir dizanin. Yên ku qadên Newrozê tijî dikin, herî baş dizanin. Ew qad wisa bi hêsanî nehat dagirtin. Ew govend wisa bi hêsanî nehat gerandin. Ger ev coş, ev vîn nebûya wê li Tirkiyeyê behsa wekhevî, demokrasî, azadî, maf, hiqûq û edaletê nehata kirin. Ev yek bi têkoşîna hevpar û vîna gel derket holê. Ji ber vê yekê yên ku zimandirêjiyê li govenda Newrozê dikin bila careke din bifikirin û li qadan binêrin.
LIHEVKIRINA BAJARAN KRÎMÎNALÎZE NEKIN
Wek keseke ku gelek caran li ser ‘lihevhatina bajar’ daxuyanî daye, ez dixwazim çend tiştan bi bîr bixim. Di pêvajoya hilbijartina 31’ê Adarê de me ragihandibû ku stratejiya me ya nû dê li şûna bide windakirin-bi ser bikeve, li ser serketinê bû. Min gotibû ku stratejiya me li ser serketinê ye û bi lihevkirina bajaran em ê bi ser bikevin. Me li vir ev biryara Desteya Rêveberiya Navendî gihandibû. Û me li vir gelek caran diyarkiribû ku ‘lihevkirina bajar’ lihevkirina herî berfireh e û ev tê wateya dengê bajêr li her derê bidin bihîstin. Bi gotineke din wê demokrasiya xwecihî ava bike. Bila êdî kes lihevkirina bajar a ku tê wateya demokrasiya xwecihî krîmînalîze neke.
Lihevhatina bajar stratejiyeke rewa ye û demokrasiya xwecihî îfade dike. Ji bo demokrasiya xwecihî gaveke xurt û bi biryar e. Yên ku ji lihevkirina bajaran ditirsin wê çawa demokrasiya Tirkiyeyê misoger bikin?”
JI AMEDÊ WÊ BIMEŞIN AMARAYÊ
Ayşegul Dogan bal kişand ser meşa Meclisa Ciwanên DEM Partiyê a dirûşma “Em bi civaka demokratîk ber bi azadiyê ve dimeşin” di navbera 1-4’ê Nîsanê ji Amedê bimeşin Amarayê ev tişt got:
“Em weke DEM Partiyê ciwanên ku ji bo hêz bidin Banga Aştî û Civaka Demokratîk ku muxatabê wê 85 mîlyon e, silav dikin. Rêya we û rêya me vekirî be. Em dizanin ku heta ku em bi hev re û bi pêşengiya jin û ciwanan têkoşîna demokrasî, azadî, wekhevî, aştî û vîna gel bimeşînin em ê bi ser bikevin.”
DIBE KU PIŞTÎ CEJNÊ HEVDÎTINA ÎMRALIYÊ PÊK WERE
Ayşegul Dogan li ser pirsa gelo wê biçin Îmraliyê yan na wiha axivî:
“Hêviya me ew e ku em vê mijarê li paş bihêlin. Me gotibû pêwîste şert û mercên ku dengê Birêz Ocalan were bihîstin, gotina wî bigihêje her derê, karibe geşedanan bişopîne, nêrînên xwe bîne ziman û pêwendî pêre bê danîn bên misogerkirin. Peyama Newrozê gelekî zela bû. Bi sed hezaran kes daxwaza azadiya birêz Ocalan kirin. Ev bang di heman demê de hesreta civakê ya aştî û demokrasiyê ye. vekirina vê rêyê pêkan e. Me dizanîbê xwedîderketineke wisa xurt heye. Me dizanîbû birêz Ocaşan navnîşana çareseriyê ye. Ji ber vê yekê me got tecrîdê rakin. Me gotibû her deqeya ku tecrîd dirêj dibe bandorê li ser jiyana me hemûyan dike. Êdî rêya Îmraliyê vekin. Rojnamevan, partiyên siyasî û saziyên demokratîk ên ku dixwazin bi birêz Ocalan re hevdîtinê bikin hene. Jin, ciwan, malbat û parêzer dixwazin hevdîtinê bikin. Divê her kes karibe hevdîtinê bikin. Bendewariya me ew e ku divê demildest birêz Ocalan bi malbat û parêzerên xwe re hevdîtinê bike. Dibe ku piştî cejnê şandeya Îmraliyê hevdîtinê pêk bîne. Divê êdî ev rê bên vekirin.”
Ayşegul Dogan der barê bernameya cejnê de jî got, “Serdanên me cejnê wê bidomin. Me bi AKP û MHP’ê re hevdîtin kir. Daxwaza MHP’ê jî ji bo cejnê heye. Wê di cejnê de serdana desthilatê bê kirin.”
