Serokê Giştî yê MHP’ê Devlet Bahçelî piştî merasîma îmhakirina çekan a PKK’ê daxuyaniye destpêkê da. Bahçelî anî ziman ku ji aliyekî ve welat, li aliyê din jî herêm ber bi serdemeke nû û bi hêvî gav bi gav diçe. Bahçelî bi bîr xist ku li ser bingeha ‘Banga Aştî û Civaka Demokratîk’ a 27’ê Sibatê ya ji Îmraliyê PKK’ê di 5-7’ê Gulana 2025’an de kongreya xwe ya 12’emîn kom kir û hebûna xwe ya rêxistinî fesix kir, ragihand ku çek daniye û got, “Ji xwe weke ku ji peyama dawî ya bi dîmen jî tê fêhmkirin, rêberê damezrîner ê PKK’ê li ser gotina xwe sekinî, soza xwe bi cih anî û gefên navneteweyî û herêmî di dema xwe de dît.”
Bahçelî anî ziman ku DEM Partî bi xeteke siyasetê ya bi berpirsyarane, bi gotin û nirxandinên hevseng û di cih de li refên xwişk û biratiyê ya hezar salî sekinî û got, “Birêz Serokkomarê me ku ji destpêkê ve xwedî li biryardariya ‘Tirkiyeya bê teror’ derket, ku veguherî polîtîkayeke dewletê û hikumet heta dawiyê xwedî li pêvajoyê derketin.”
Bahçelî destnîşan kir ku ji niha û pê ve bûyerên dîrokî diqewimin ku rêxistin kom bi kom çekan radest bike, di heman demê de dawî li serdemeke tarî bê anîn û got, “Hêviyên hin derdorên îdeolojîk û siyasî yên ku bi armanca zindîkirina atmosfera provokasyonê ketin pêşbirka înkar û îstîsmarê, li pêşberî atmosfera aramî û aştiyê şikestiye. Bi rastî jî hem ji bo Tirkiyeya me hem jî ji bo herêma me rojên gelekî girîng in. Lewma ev bûyerên erênî û dilê mirovan xweş dike, bi rastî jî mîladeke û di wijdanan de cihê kêfxweşiyê ye. Di serî de Birêz Serokkomarê me ez spasiya her kesî dikim ku ji bo armanca ‘Tirkiyeya bê teror’ ked dan, ketin nava hewldanan, piştgirî dan, hêvî dikim ku ev dema nû li miletê me yê ezîz bi xêr be.”
