Rêber Apo 27’ê Sibatê bangeke dîrokî kir. Ev banga bi sernavê “Banga Aştî û Civaka Demokratîk” tenê ne li Kurdistan û Tirkiyeyê li tevahiya cîhanê deng veda.
Gaziya şer Zarîn Kobanê têkildarî banga Rêber Apo ya serdemê nêrînên xwe anîn ziman.
Zarîn Kobanê destnîşan kir ku banga Rêber Apo di asta şoreşekê de ye û manîfestoyeke ji bo hemû pirsgirêkên herêmê û cîhanê ye û got, “Weke gaziya şer gelekî bi kelecan û coş im. Me piştî bi salan wêneyê Rêber Apo dît û banga wî bihîst. Rêber Apo bi salan e ji bo azadiya gelan û jinan têkoşîn dike. Em bi saya Rêber Apo li xwe serwext bûn bê em kî ne û divê em çawa bijîn. Hêviya me bi Rêbertî pir mezin e. Ev banga Rêberê me bangeke pîroz e, banga serketinê ye. Weke gaziyên şer heya dawiyê em ê li pişt banga Rêberê xwe bin.”
Gaziya şer Zarîn diyar kir ku li pêşiya me rojên girîng ên weke 8’ê Adarê, 21’ê Adarê Newroz û 4’ê Nîsanê rojbûna Rêber Apo heye û wiha dewam kir, “Divê di van rojên girîng de em vê banga Rêbertiya xwe bêhtir derxin pêş. Li hember her cure nebaşiyan divê bi taybet jin û ciwan berxwedanê mezin bikin.”
Zarîn Kobanê di dewama axaftina xwe de anî ziman ku wê bi têkoşîn û berxwedanê azadiya fizîkî ya Rêber Apo pêk bînin û wiha axivî: “Ji bo ev pêvajo bi ser bikeve divê rayedarên dewleta Tirk mîna demên berê nekevin nav xefletên bi awayê, ‘Em ê Kurdan û dostên wan vê carê bi temamî tesfiye bikin.’ Divê her kes zanibe ku kesên xwe bi fikir û îdeolojiya Rêber Apo gurçûpêç kirine, ti carî nayên lîstikan. Rêber Apo kesayetên heya dawiyê ji xwe bawer û xwe di serketinê de kilît kirine ava kiriye. Em ji Rêbertî, ji xwe û ji gelên xwe piştrast in. Bila gelên me jî zanibin ku em ê heya dawiyê ji bo wan têkoşîn bikin. Jiyaneke azad û wekhev teqez em ê di pêşengiya Rêber Apo û jinên şoreşger de ava bikin. Em ê armancên şehîdên me di oxira wan de canê xwe dan teqez di pêşengiya Rêber Apo de pêk bînin. Bijî jiyana azad.”
