Berdevkê Yekîneyên Berxwedana Şengalê (YBŞ) Hadî Êlyas di ‘Hevpeyvîneke Taybet’ a Çira TV de li ser mijara entegrasyona saziyên ewlekarî û rêveberiyê yên Şengalê yên bi dewleta Iraqê re axivî.
Di destpêka axaftina xwe de Hadî Êlyas işaret bi dema destpêkirina hevdîtinên wan ên bi rayedarên dewletê re kir û got, “Meha Sibatê hevdîtinên bi berpirsiyarên asta bilind ên ewlehî û leşkerî re destpê kirin. Armanca van hevdîtinan gihîştina peymaneke rast û ewle ye ku di çarçoveya wê de hêz, dezgeh û civaka me di nav pergala dewleta Iraqê de werin entegrekirin. Ev yek di heman demê de xizmeta serweriya Iraqê jî dike. Em di vê mijarê de pir cidî ne. Her wiha tiştekî fermî û rewa pêwîst e ku rê li ber çareserkirina pirsgirêkên din ên Şengalê veke. Çareserkirina vê meseleyê pêngava yekem û bingehîn e ku rê li ber çareseriyên din hêsan dike.”
Berdevkê YBŞ’ê destnîşan kir ku pirsgirêka Şengalê tenê bi aliyê ewlehiyê ve nayê sînorkirin û got, “Her çend ewlehî beşeke gelekî girîng be jî, meseleyên din ên bingehîn hene ku divê werin çareserkirin. Ji van re vegera xelkê, tazmînata welatiyan, avakirina gund û bajaran, çareserkirina dosyaya windahiyan û rizgarkirina zêdetirî 1780 kesên ku heta anha di destê DAIŞ’ê de ne mînak in. Dema ku meseleya ewlehiyê bi awayekî fermî, sîstematîk û pergalî bête çareserkirin, ew ê bingehekî xurt biafirîne ku taybetmendî û destkeftiyên Êzdiyan werin parastin û mafên wan di nav dewleta Iraqê de werin mîsogerkirin.”
Hadî Êlyas bi bîr xist ku bi destpêkirina dema hikumeta Serokwezîr Elî Zeydî re plana entegrasyona hêzan ete rojevê û got, “Em jî wek hêzeke ku di rojeke hesas de çêbûye di nav de bûn. Me ti carî xwe ji dewletê qut nekiriye. Entegrasyona fermî ne axaftineke li ser kaxezê ye; hem hêza me, hem civaka me û hem jî dewletê xurt dike. Em dixwazin entegrasyoneke rastîn çêbibe da ku taybetmendiyên hêz û civaka me bên parastin û rê li ber dubarebûna karesatên mîna yên sala 2014’an bête girtin.”
Berdevkê YBŞ’ê axaftina xwe bi vî rengî dewam kir:
“Di zincîra hevdîtinan de û taybet di hevdîtina bi Serokwezîr re, em li ser gelek xalan li hev hatine. Daxwaza me ew e ku YBŞ, YJŞ û Asayîşa Êzdîxanê bibin beşek ji sîstema fermî ya dewletê. Gelek xal hatine gotûbêjkirin ku mafên wan şervanên ku ji sala 2014’an ve li ber xwe dane bête parastin û di xizmeta xelkê Şengalê de cih bigirin. Danûstandin hêj berdewam in da ku encameke bi bandor bi dest bikeve.”
Li ser dirêjbûna pêvajoya entegrasyonê Hadî Êlyas ev nirxandin kir:
“Dirêjbûna vê pêvajoyê tiştekî gelekî normal e, çunku ev ne veguhastina yekîneyeke leşkerî ya asayî ye. Dosyeyeke gelekî hesas e ku rasterast bi civak, paşeroj û hêza Şengalê re girêdayî ye. Di nav sîstemê de taybetmendiyên nû yên mîna hebûna jinan û Asayîşa Êzdîxanê hene ku ji bo Iraqê jî nû ne. Ji ber vê yekê lêkolîn û nîqaşên kûr li ser tevlîbûn, cografya û rewşa civakî tên kirin da ku çareseriyeke daîmî û xurt peyda bibe.”
Berdevkê YBŞ’ê destnîşan kir ku îdîaya ku dibêje YBŞ dijî dewleta Iraqê ye nêrîneke xelet e û berovajî rastiyê ye û got, “Civaka Êzdî û hêza me ji bo ax û serweriya Iraqê qurbanî dane. Di wê demê de ku ala Iraqê li parêzgehên mîna Enbar, Tikrît û Mûsilê tune bû, hêzên me bi xwîna xwe ala Iraqê li Şengalê bilind kirin. Ev yek dilsoziya me ya beramberî welat nîşan dide. Gotinên dijber propagandaya ragihandinê ne. Civaka me ti carî xwe ji Iraqê cuda nedîtiye û ji bo xurtkirina serweriya dewletê şer kiriye.”
Hadî Êlhas herî dawî ev peyam da hikumeta Iraqê û gelê Şengalê: “Peyama me ji bo hikûmeta Iraqê ew e ku em di meseleya entegrasyoneke fermî û pergalî de gelekî cidî ne û em dixwazin hêzên me di nav pergala ewlehiyê de cih bigirin. Ji bo xelkê me jî peyama me ew e ku ev gav dê paşeroj, ewlehî û mafên civaka me garantî bike. Îstiqrara rastîn bi dadperwerî, mafên Êzdiyan û nûvekirina Şengalê re çêdibe. Em bi hêvî ne ku ev pêvajo di zû de encam bide û bikeve xizmeta civakê û serweriya dewleta Iraqê.”
