Berî niha bi salekê 8’ê Kanûna 2024’an Rejîma Baas a bi dehan salan li Sûriyeyê desthilatdar bû, hilweşiya. Gazî Şîlan Kobanê, Ezîme Zagros û Baz Efrîn têkildarî mijarê nêrînên xwe anîn ziman.
‘TU CUDAHIYA BAAS Û HTŞ’Ê JI HEV NÎNE’
Şîlan Kobanê, diyar kir ku rejîma Baas a 61 salan li ser desthilatdariyê ma, gelek êş û azar bi gel dan kişandin û got, “Em vê rojê li hemû gelan pîroz dikin. Malbata Beşar ji 1971’ê ve welêt bi darê zorê bi rê ve dibir. Di serî de Kurd, gelek gel û baweriyên cuda yên li Sûriyeyê rastî zilm û zordariyên giran hatin. Divê were zanîn ku li hember vê rejîma zordar serhildan ne 2011’an ya rastî 2004’an li Rojavayê Kurdistanê dest pê kirin. Cara yekem gelê Kurd li hember vê rejîmê serî rakir. Şoreşa Bakur û Rojhilatê Sûriyeyê berhema serhildana 2004’an e.”
Şîlan Kobanê destnîşan kir ku li piştî hilweşîna rejîma Baas, HTŞ’ê ya ku xwe li Şamê kiriye desthilat jî heman rêbazên rejîma berê bi kar tîne û wiha domand, “Divê were zanîn hêzên ku baweriyên cuda û jinan ji nedîtî ve bên, dê biser nekevin. Gelên Sûriyeyê êdî ji hêza xwe bawer in. Me ev li Bakur û Rojhilatê Sûriyeyê, li Siwêdayê baş dît. Êdî ne mimkun e Sûriye bi siyaseta tekperestî were meşandin. Gelên Sûriyeyê û bi taybet jinên azadîxwaz wê ti carî dest ji mafên xwe bernedin.”
Şîlan Kobanê axaftina xwe wiha bi dawî kir, “Li hember her cure zext, êrîş û tundiyan weke jin û gelên Sûriyeyê divê em yekîtiya xwe xurt bikin. Ti ferqa rejîma BAAS û HTŞ’ê ji hev nîne. Weke gaziyên şer jî em bang li ciwanan dikin bi xurtî tevlî nav refên QSD û YPJ’ê bibin. Em li ser esasê fikir û bîrdoziya Rêber Apo dimeşin. Pergaleke demokratîk a hemû gel, bawerî û jin karibin bi awayekî azad xwe îfade bikin û bi rola xwe rabin em ê ava bikin.”
‘ÊDÎ GEL JI GEFAN NATIRSIN’
Baz Efrîn, jî anî ziman ku piştî hilweşîna rejîma Baas jî li welêt xwîn nesekiniye û wiha axivî, “HTŞ’ya bi alîkariya hêzên derve ket Şamê, welêt ber bi kaosekê ve dibe. Niha hinek hêz dixwazin rewatiyek bidin serokê HTŞ’ê Colanî. Lê divê were zanîn ku fikrên HTŞ’ê ji sedî sed ne li gor xwezaya Sûriyeyê ne. Li dijî xelkê me yê Elewî û Dûrzî komkujiyên mezin pêk anîn. Ev zîhniyet ne mimkun e di siberoja Sûriyeyê de ji xwe re cihekî peyda bike.”
Ez bi xwe weke gaziyekî şer li hemberî şerê navxweyî me. Ji bo parastina xak û gelên xwe me berxwedan û têkoşîneke ku mînakên wê kêm in, pêş xist. Lewma bila her kes zanibe ku di serî de gelê Kurd, êdî ti gel û bawerî ji gef û êrîşan natirsin. Divê her kes bi aqlê selîm bifikire û welat careke din ji bo berjewendiyên hinek hêzan ber bi şer ve dehf nedin. Bi hezaran jin û mêrên egîd xwe ji bo jiyaneke azad û wekhev feda kirin. Em ê jiyaneke azad a li ser esasê xwişk û biratiya gelan teqez ava bikin. Ez li ser vî esasî tevahî gelên me û hêzên me yên QSD-YPJ bi rêzdarî silav dikim.”
‘DIVÊ EM XWEPARASTINÊ XURT BIKIN’
Ezîme Zagros, jî yekemîn salvegera hilweşîna rejîma Baas li hemû gelan pîroz kir û got, “Divê were zanîn ku zilm û zordarî tiştekî mayînde nîne. Yên zilmê dikin wê teqez rojekê têk biçin. Rejîma Baas û desthilata malbata Beşar bi berxwedana gelan têk çû. Ew kesên îro li Şamê xwe kirine desthilat divê zanibin ku eger polîtîkayên mîna rejîma Baas bidomînin, wê heman aqubet bê serê wan jî. Weke gelê Kurd û gelên herêmê em alîgirên aştî, xwişk û biratiyê ne. Bi dehan salan e, me gelek berdêlên mezin dan. Ji bo parastina destketiyên xwe yên bi xwîna bi hezaran şehîdan ava bûne, çi berdêl pêwîst bike em ê bidin.
Pêdiviya xelkên Sûriyeyê bi pergaleke demokratîk heye. Divê were zanîn yên li şûna Beşar Esed rûniştine jî li beravên Sûriyeyê û Siwêdayê xelkên vî welatî qetil dikin. Divê li hember van kiryaran em xweparastinê xurt bikin. Bi yekîtiya gelan em ê welatekî azad ava bikin.”
