Berhema ku gotin û muzîka wê ya Cewad Merwanî ye, çavkaniya xwe ji jiyan û têkoşîna Hebûn Farqîn digire.
Cewad Merwanî diyar kir ku bê ka çima navê ‘’Dilşêrîn’’ li klîbê kiriye û got: ‘’Serdemekê navê Dilşêrîn bi kar anî. Ji ber vê yekê min navê klîbê kir Dilşêrîn.’’
Hunermend Cewad Merwanî piştre ev yek anîn ziman: ‘’Hevalê Dilşêrîn ji gundê Zinzinê yê Farqînê ye. Tekane zarokê malbatê ye. 3,5 di nava gerîlayan de ma. Li Dêrsimê li gel heval Atakan Mahîr têkoşiya. Dema ku tevlî karwanê şehîdan bû, 23 salî bû.’’
Hebûn Farqîn, di 21’ê Gulana 2018’an de tevlî karwanê şehîdan bû. Lê belê cenazeyê wî nedan malbata wî. Dayika wî bi mehan li pêşiya Saziya Tiba Edlî nobed girt û hewl da cenazeyê kurê xwe bistîne. Vê yekê bandoreke mezin li hunermend Cewad Merwanî kir. Merwanî, li ser vê pêvajoyê û têkoşîna dayika şehîdî ji bo Hebûn Farqîn berhemeke taybet çêkir.
Cewad Merwanî pêvajoya nivîsandin û amadekirina berhemê bi van gotinan anî ziman:
‘’Nivîsandina stranê 1-1,5’an berdewam kir. Mirov hizra pêşeroj û dîrokê dike û dixwaze edebî û mayînde be. Mirov dibêje ku bila muzîka wê neşibe muzîka berhemên din. Ji ber vê yekê nivîsandin û bestekirina stranan gelekî dema min digire. Dema ku min gotin û muzîka stranê qedandin, min li Kolnê li studyoya hevalê Memo Gul tomar kir. Aranjeya wê jî ji aliyê Memo Gul ve hate amadekirin. Piştre em derbasî qeydê bûn. Stran ji aliyê min, Binevş Roj, Zozan Zûdem, Gulîstan, Bêrîvan û Yeşîm Încedûrsûn ve hate xwendin. Klîb jî min û Binevş Roj, Zozan Zûdem û Gulîstan me bi hev re kişand.’’
Klîba ‘’Dilşêrîn’’ ji alyê kedkarên Produksiyona Med Hunerê ve hate kişandin û li ser rûpela Med Huner a YouTube’yê hate weşandin.
