Komeleya Mafên Mirovan (ÎHD) û xizmên windayan li Amed, Êlih û Colemêrgê li aqûbeta windayan pirsin û daxwaza edaletê kirin.
AMED
Xizmên Windayan û rêveberên Şaxa Komeleya Mafên Mirovan (ÎHD) a Amedê di hefteya 876’emîn de çalakiya “Bila winda bên dîtin û faîl bên darizandin” li pêşiya Bîrdariya Mafê Jiyanê ya Parka Koşûyolû ya Amedê li dar xist. Di daxuyaniyê de endam û rêveberên ÎHD’ê û Xizmên Windayan, aktîvîstên Tevgera Jinên Azad (TJA), Hevşaredarên Peyasê, Dayikên Aştiyê, rêveberên Komeleya 78an, TUAY-DER, MEBYA-DER, TOMMOB, OHD, Egîtîm Sen û gelek kes beşdarî çalakiyê bûn.
Kesên ku beşdarî çalakiyê bûn wêneyên kesên ku hatine windakirin hildan û vê hefteyê li aqûbeta Makbûle Okten a ku di sala 1991’î de li navçeya Cizîrê ya Şirnexê hatibû windakirin û piştî 18 salan di encama xebatên rêyan de rastî hestiyên wê hatibûn pirsîn.
Vê hefteyê di çarçoveya 25’ê Mijdarê Roja Têkoşîna li Dijî Tundiya li Ser Jinan a Navneteweyî de; faîlên Makbule Okden, Bedriye Gumuş, Ayten Ozturk, Ridda Yavuz, Sedîka Dal, Hamîde Şarli, Hatun Işik, Yeter Işik, Elif Işik, Gulîzar Serîn, Dîlek Serîn, Lutfiye Kaçar, Gulnaz Tatu, Kadriye Tatu, Ayşenur Şîmşek, Hatîce Şîmşek, Şukran Daş, Hatîce Atalay, Fahriye Mordenîz, Zozan Eren, Neslihan Uslu, Konca Kuriş, Taybet Înan (Dayê Taybet), Gulistan Doku, Nagihan Akarsel, Gulistan Tara û Cihan Bilgin hatin pirsîn.
Daxuyanî bi çalakiya rûniştinê bi dawî bû.
ÊLIH
Çalakiya Komeleya Mafên Mirovan (ÎHD) û xizmên windayan li Êlihê di hefteya 712’an de li ber Abîdeya Mafên Mirovan a li Kolana Gulistanê berdewam kir. Di çalakiya vê hefteyê de li aqûbeta Siddik Kaya ku di 20’ê Mijdara 2002’yan de li gundê Karapinar ê navçeya Gimgim a Mûşê hat windakirin, hat pirsin.
Rêveberê Şaxa ÎHD’ê Metîn Nas metna daxuyaniyê xwend.
Daxuyanî bi çalakiya rûniştinê bi dawî bû.
COLEMÊRG
Şaxa ÎHD a Colemêrgê û xizmên windayan ji bo hefteya 202’emîn a çalakiya xwe li Kolana Hunerê ya navçeya Gever a Colemêrgê kom bûn. Pankarta “Bila winda bên dîtin, kiryar bên darizandin” û wêneyên windayan hatin vekirin. Vê hefteyê xizmên windayan li kiryarên kuştina Îslam Terkoglû yê di 23’yê Mijdara 2006’an de hat qetilkirin, pirsîn.
Daxuyanî ji aliyê rêveberê ÎHD’ê Eren Baskin ve hat xwendin.
Çalakî, bi çalakiya rûniştinê ya 5 deqeyan bi dawî bû.
