Di hevdîtinê de, cezayên DYE’yê yên li ser Sûriyê ji bo 6 mehan hatin rawestandin. Hikûmeta Şamê, bi rengekî fermî tevlîbûna xwe di koalîsyona navneteweyî ya bi serkêşiya Emerîkayê ya li dijî DAÎŞ’ê de ragihand.
Serdan rojek piştî ku Sûriye ji “lîsteya rêxistinên terorîst” a DYE’yê hate derxistin, pêk hat. Ehmed el-Şara yekem serokê Sûriyeyê ye ku ji bo Washingtonê hate vexwendin.
SERDAN BI MERASÎMEKE AWARTE NEBÛ
Serdan bêyî merasîmek fermî, bi rêya deriyek ku ji kamerayan re girtî bû pêk hat. Civîn ji çapemeniyê re girtî pêk hat û ti daxuyanî nehat dayîn. Li gorî AFP’ê Trump tenê gotiye, “Ez jê hez dikim. Ji bo Sûriye bi ser bikeve, em ê her gavê bavêjin.”
CEZA BI RENGEKÎ DEMEKÎ HATIN RAWESTANDIN
Hikûmeta Şera, bi îdîaya ji bo jinûve avakirina Sûriyeyê daxwaza zêdekirina veberhênanê kiribû. Li hember vê daxwazê Washingtonê cezayên Qanûna Caesar ji bo şeş mehan rawestand. Ji bo ku ev biryar bi tevahî bê rakirin, divê Kongre biryarê erê bike.
SOZÊN ŞERA
Li gorî Berdevkê Karûbarên Derve yê DYE’yê, Şera li hember vê gavê soz daye ku hevkariya leşkerî li dijî DAÎŞ û cîhadîstan, ji bo ji holê rakirina çekên kîmyewî tevlî xebatan bibe, têkoşîna li dijî narkotîkan û di diyarkirina eqûbata Emerîkiyên winda de hevkarî bike.
BENDA LEŞKERÎ YA NÛ
Li gorî çavkaniyên dîplomatîk, DYE’yê plan dike ku li nêzî paytextê baregehek ava bike; armanc sînordarkirina bandora Îranê, xurtkirina parastina hewayî ya Îsraîlê û kontrolkirina DAÎŞ e.
Ehmed El-Şera berê wek serokê rêxistina Heyat Tehrîr el-Şam ya girêdayî El Qaîde dihat naskirin û bi navê “Ebû Mihemed el-Cûlanî” dihat naskirin. Nêzîkî salek berê piştî ku li Şamê hat ser desthilatê, di ‘pêvajoya derbasbûnê’ de bi sozên reformên siyasî ji bo komên mezhebî û olî, li welatên Rojava dest bi hevdîtinan kir. Lê belê di vê demê de komkujiyên ku Elewî û Durzî hedef digirin, pêk hatin. Tevî vê jî, ew ji hêla hêzên herêmî û navneteweyî ve hate pêşwazîkirin û nûkirina îmaja xwe berdewam kir.
Ceza hefteya borî bi fermî hatin rakirin.
