5’emîn Dadgeha Cezayê Giran a Amedê, 3 sal 9 meh cezayê hepsê li Hevşaredarê Bajarê Mezin ê Wanê Abdullah Zeydan birî. Hevserokê Bajarê Wanê yê DEM Partiyê Weysî Dîlekçî û Parlamenterê Wanê Zulkuf Ûçar diyar kirin ku biryar bi talîmatê hatiye dayîn û hişyar kirin ku tayînkirina qeyûm dê pirsgirêkê kûrtir bike.
DÎLEKÇÎ: AKP DIXWAZE TÊKÇÛNA HILBIJARTINÊ BI QEYÛMAN SAFÎ BIKE
Hevserokê Bajarê Wanê yê DEM Partiyê Weysî Dîlekçî bi bîr xist ku Hevşaredarê Bajarê Mezin ê Wanê Abdullah Zeydan ji ber xebatên xwe yên siyasî yên di 2015’an de ku wê demê parlamenter bû hat darizandin û wiha got: “Ev ne biryareke hiqûqî ye. Di hinceta biryara dadgehê de, biryara dozgeriyê ya betalkirinê hebû. Lê hem rayedarên leşkerî hem raporên şahid û pisporan îdîaya dozgeriyê pûç dikirin. Lê tevî vê yekê 5’emîn Dadgeha Cezayê Giran a Amedê ev biryara derhiqûqî da. Armanca vê biryarê ew e ku AKP dixwaze têkçûna xwe ya di hilbijartinê de bi rêya qeyûman telafî dike û destkeftiyên gelê Wanê desteser dike. Divê rêzê li vîna gelê Wanê bigirin û paşde gav biavêjin. Şaredariya Bajarê Mezin a Wanê ya gel e û em ê rê nedin vê derhiqûqiyê.”
ÛÇAR: MEBESTA WAN DESTESERKIRINA VÎNA GEL E
Parlamenterê Wanê yê DEM Partiyê Zulkuf Ûçar wiha axivî: “Em îro dîsa bi rûyê xespker ê desthilatê re rû bi rû mane. Desthilatê îro dîsa bi telîmatekê ceza da Hevşaredarê Bajarê Mezin ê Wanê. Sûcekî bi navê ‘Bi zanebûn û bi dilxwazî alîkarîdayîna rêxistinê’ tune ye. Ev bi bi temamî xespkirina vîna gel e. Di vê demê ku daraz bi temamî ketiye bin serweriya desthilatê de bila kes ji me re behsa hiqûq û edaletê neke. Ji aliyekê ve qaşo pêvajoyek dane destpêkirin lê ji aliyekî ve jî vîna gel desteser dikin. Ev her du kiryar li hevdu nayên, çareserî wiha pêk nayê. Divê dev ji vê helwesta deraqilane berdin. Hûn nikarin di heman demê vîna gel desteser bikin, gefan li çapemeniya azad bixwin, qasidên heqîqetê bixin zindanan û bi ser de rabin pêvajoya çareseriyê bimeşînin.”
Zulkuf Ûçar axaftina xwe wiha bi dawî anî: “Ev gel sed sal in li ber xwe dide û dê berxwedana xwe bidomîne. Gel dê rê nede vê feraseta xespker a desthilatê û dê serî netewîne. Em ji vir careke din dibêjin ku hûn zirarê didin hêvîya ku Birêz Ocalan ji bo azadî û aşîtiyê afirandiye. Hûn ne durist in; heger armanca we çareserî be hûn nikarin bi qeyûman vê yekê pêk bînin. Ev biryar bi talîmetê hatiye dayîn û hûn nikarin bi gel bidin bawerkirin ku ev biryareke hiqûqî ye. Ev gel hem dê xwedî li hêviya aşîtiyê derkeve hem jî dê têkoşîna xwe ya li dijî desteserkirina vîna xwe li dijî desthilatê bide.”
