Bi wesîleya 3’yê Gulanê Roja Azadiya Çapemeniyê ya Cîhanê, Komeleya Rojnamevanan a Dîcle Firat (DFG), Komeleya Rojnamevanên Jin ên Mezopotamyayê (MKG), DÎSK Basîn-Îş, Komeleya Rojnamevanên Çagdaş (ÇGD), Haber-Sen û Komeleya Rojnamevanan li ber Wezareta Edaletê meş û daxuyaniya çapemeniyê lidar xistin. Pankarta bi nivîsa “Rojnamevanî ne sûc e” hat vekirin, wêneyên rojnamevanên hatine qetilkirin hatin hilgirtin û dirûşmeyên “Çapemeniya azad nayê bêdengkirin” hatin berzkirin.
Endama Desteya Rêveber a Basin-Îşê ya DÎSK’ê Îzel Sezer, diyar kir ku ne tesadufe ku Tirkiye di mijara azadiya çapemeniyê de di rêza 159’an de be û bal kişand ser sansur, zextên aborî û darizandinên li ser rojnamevanan.
Îzel Sezer got, “Rojnamevanên ku beşdarî mitîngan dibin, nivîsên rexnegir dinivîsin an jî nûçeyan dişopînin, bi hincetên cuda yên hiqûqî tên binçavkirin, girtin û cezayê hepsa malê li wan tê birîn. “ Sezer, anî ziman ku îro bi rêziknameyên nû yên weke ‘sîxûriya bi bandor’ dîsa rojnamevan tên hedefgirtin û hat gotin rojnamevanî ne sûc e.
Li ser navê DFG’ê Selman Guzelyuz axivî û diyar kir ku çapemeniya azad serî li ber zextan natewîne û ji ber vê yekê rojnamevan tên hedefgirtin û qetilkirin.
Li aliyê din Parlamentera DEM Partiyê ya Amedê Ceylan Akça, xebatkarên çapemeniya azad silav kir û bal kişand ser sînordarkirina azadiya çapemeniyê.
